Քաղաքացիական բյուջետավորման մրցույթի վերջնաժամկետը, հայտեր չլինելու պատճառով, 2 շաբաթով երկարաձգելուց հետո, Ախալքալաքի մունիցիպալիտետի քաղաքապետարանը կրկին գաղափարների մրցույթին մասնակցելու ոչ մի հայտ չի ստացել։ Քաղաքացիական բյուջետավորումն Ախալքալաքում երկրորդ տարին է իրականացվում։
Քաղաքացիական բյուջետավորումն Ախալքալաքի մունիցիպալիտետում ներդրվել է 2023 թվականին «HEKS-EPER Georgia» կազմակերպության ծրագրի շրջանակներում, Սամցխե-Ջավախքի գործընկերոջ, Քաղաքացիական հասարակության ձևավորման աջակցության կենտրոն (SCCSF) կազմակերպության աջակցությամբ: Ախալքալաքի բնակիչների ներկայացրած լավագույն գաղափարն իրականացնելու համար այս տարի մունիցիպալիտետի բյուջեով հատկացվել է 30 հազար լարի։ Այդ միջոցներն օգտագործվել են Ախալքալաքի կենտրոնական այգում մեծ ինտերակտիվ գովազդային վահանակի տեղադրման համար։ Հաջորդ տարի նախատեսվում է հատկացնել 50 հազար լարի։
Հուլիսի 15-ից օգոստոսի 16-ը, երբ հայտարարվել էր բնակիչների դիմումների ընդունման մրցույթ, քաղաքապետարան ոչ ոք նախագիծ չէր ներկայացրել։ Օգոստոսի 23-ին քաղաքապետարանը որոշում է կայացնում 2 շաբաթով՝ մինչև սեպտեմբերի 6-ը, երկարաձգել հայտերի ընդունման վերջնաժամկետը, սակայն կրկին քաղաքապետարանը մրցույթին մասնակցելու հայտեր չի ստանում։
«Մենք ոչ մի գաղափար չենք ստացել, չգիտեմ միջոցներ կհատկացնենք, թե ոչ, և ինչ հիմքով պետք է հատկացնենք։ Չգիտենք, թե ինչ ենք անելու»,- ասաց Ախալքալաքի մունիցիպալիտետի փոխքաղաքապետ Մկրտիչ Մղդեսյանը։
Նշենք, որ նախորդ տարի այս ծրագրով Ախալքալաքի քաղաքապետարան էր ներկայացվել 4 հայտադիմում, այդ ժամանակ ևս մեկ անգամ երկարացվել էր հայտերի ընդունման ժամկետը։
