Վրաստանի խորհրդարանի երկու գործող պատգամավորներ՝ «Միացյալ ազգային շարժումից» Ազեր Սուլեյմանովը և «Վրացական երազանքից» Ռուսլան Գաջիևը իրենց ֆեյսբուքյան էջերում անդրադարձել են արցախա-ադրբեջանական շփման գծում ստեղծված իրադարձություններին: Փոխանցում է Ալիք մեդիա լրատվականը:
Ազեր Սուլեյմանովը նաև բաց նամակով է դիմել Ադրբեջանի նախագահ Իլհամ Ալիևին և նշել, որ «վերջինիս որոշիչ քայլերով իրենց հողերը վերջանականապես կազատագրվեն»: Ազեր Սուլեյմանովը Հայաստանին մեղադրում է հարավային Կովկասում անկայունություն մտցնելու և Ադրբեջանի տարածքի 20 տոկոսի օկուպացման մեջ: Պատգամավորը նաև Հայաստանին մեղադրում է Վրաստանի դեմ արված հանցագործության մեջ:
Ինչ վերաբերում է իշխող «Վրացական երազանք» կուսակցության պատգամավոր Ռուսլան Գաջիևին, նա նույնպես իր աջակցությունն է հայտնել Ադրբեջանին և նշել, որ «Ադրբեջանի զինված ուժերի հաջող ռազմական գործողությունները՝ նրա տարածքային ամբողջականությունը հաստատելու համար, հիմք են տալիս ասելու, որ մեր տարածաշրջանում նման հակամարտությունները պետք է շուտափույթ լուծում ստանան»:
Սեպտեմբերի 27-ին՝ ժամը 07:15-ի սահմաններում, ադրբեջանական կողմն օգտագործելով հրետանային միջոցներ ու հարվածային ԱԹՍ-ներ, հարձակման է անցել արցախա-ադրբեջանական հակամարտ զորքերի շփման գծի ողջ երկայնքով՝ թիրախավորելով նաեւ խորը թիկունքում տեղակայված բնակավայրերը, այդ թվում՝ մայրաքաղաք Ստեփանակերտը: