---

Վրաստանի 2024 թվականի բյուջեում միջազգային կազմակերպություններից և օտարերկրյա կառավարություններից ստացված դրամաշնորհները կազմում են ընդհանուր դրամաշնորհների գրեթե 57%-ը, մնացածը տարբեր կենտրոնական կառավարական և այլ իրավաբանական անձանց դրամաշնորհներն են։ Այս տվյալները ներկայացնում է bpn.ge-ն։

Երկրի հիմնական ֆինանսական փաստաթղթի համաձայն՝ 2024 թվականին պետական բյուջեի եկամուտներում դրամաշնորհների չափը կազմել է 266 մլն լարի, որից 129,8 մլն լարին ստացվել է միջազգային կազմակերպություններից, 20 մլն լարին օտարերկրյա կառավարություններից, 1,2 մլն լարին՝ օտարերկրյա իրավաբանական անձանցից։ Կենտրոնական կառավարական կառույցների և իրավաբանական անձանց դրամաշնորհների չափը սահմանվել է 115 մլն լարի։

2024 թվականին Եվրամիության դրամաշնորհը կազմում է 105 միլիոն լարի, որտեղից ամենաշատ միջոցները ծախսվում են հետևյալ ծրագրերի վրա.

• Եվրամիությունն ինտեգրված տարածքային զարգացման համար (EU) – 63 մլն լարի։
• ENPARD IV – Գյուղատնտեսության և գյուղի զարգացման եվրոպական հարևանության ծրագիր IV (EU) – 16,9 մլն լարի։
• Հմտությունների զարգացում և զբաղվածության շուկայի կարիքներին համապատասխանություն (EU) – 12,6 մլն լարի։
• EU4 – կայուն կառավարում և ճկունություն (EU) – 7,5 մլն լարի։
• Աջարիայի գյուղերի ջրամատակարարման ծրագիր (EU, KfW) – 5 մլն լարի։

Բացի այդ, բյուջեի համաձայն՝ դրամաշնորհների միջոցով կիրականացվեն Քվեմո Քարթլիի կոշտ թափոնների ծրագրերը, պահպանվող տարածքների զարգացման ծրագիրը և այլն։

Սրա հետ մեկտեղ, տարբեր կառավարություններից ստացված 20 մլն լարի դրամաշնորհից 11,5 մլն լարին կծախսվի կենսաբազմազանության և կայուն տեղական զարգացման ծրագրի վրա, 2,3 մլն լարի կառավարական շենքերի էներգաարդյունավետության ծրագրի համար, 1,5 մլն լարի՝ մասնագիտական կրթական ծրագրի համար և այլն։

«Օտարերկրյա ազդեցության թափանցիկության մասին» օրենքի ընդունումից հետո, որը Վրաստանի քաղաքացիական հասարակության, ինչպես նաև միջազգային հանրության կարծիքով՝ հեռացնում է Վրաստանը ժողովրդավարական զարգացումից, Եվրամիությունը, ինչպես նաև որոշ երկրներ հայտարարել են ֆինանսական օգնության դադարեցման մասին։