«Մեգոբարի» ակտը, որը նախաձեռնվել է ԱՄՆ-ում և նախատեսում է մի կողմից տնտեսական կապերի խորացում և առանց վիզայի ռեժիմի ներդրում, եթե Վրաստանը շարունակի իր ժողովրդավարական կուրսը, մյուս կողմից՝ պատժամիջոցների փաթեթ, Կոնգրեսում քվեարկության կդրվի մինչև ամսվա վերջ, այս մասին X սոցիալական ցանցում հայտնում է լրագրող Ալեքս Ռաֆօղլուն, ով Վաշինգտոնում զբաղվում է Հարավային Կովկասի հարցերով։
Ինչպես գրում է Ալեքս Ռաֆօղլուն, փաստաթուղթը կքննարկվի հուլիսի 10-ին կայանալիք համաժողովում, իսկ բանավեճերի և քվեարկության անցկացումը նախատեսվում է մինչև հուլիսի վերջ։
Ամերիկյան Կոնգրեսի երկու պալատներում էլ ներկայացվել են օրենսդրական նախաձեռնություններ, որոնցում սենատորներն ու Ներկայացուցիչների պալատի անդամները հայտարարում են իրենց աջակցությունը վրաց ժողովրդի արևմտյան ձգտումներին։ Այնուամենայնիվ, դրանք նաև սահմանափակումներ են նախատեսում իշխող թիմի անդամների նկատմամբ՝ նրանց ժողովրդավարությունը խաթարող գործողությունների համար պատասխանատվության ենթարկելու նպատակով։
Fox News-ը հայտնում է, որ MEGOBARI ակտը պատժամիջոցներ կսահմանի երկրի քաղաքական կամ կառավարական ղեկավարության, գործարար շրջանակների, իրավապահ և անվտանգության մարմինների դեմ, ովքեր պատասխանատու են «օտարերկրյա գործակալների մասին ռուսական օրենքն առաջ մղելու» և բողոքի ցույցերը ճնշելու համար:
Օրինագծի համաձայն՝ դրա ուժի մեջ մտնելուց հետո 60 օրվա ընթացքում պետքարտուղարը պետք է բացահայտի այն հիմնական անձանց, ովքեր Վրաստանի կառավարության անդամ են, աշխատում են որպես Վրաստանի կառավարության գործակալներ կամ նրա անունից, կամ այլ կերպ ի վիճակի են ուժեղ ազդեցություն ունենալ նման կառավարության գործողությունների վրա և «նյութական պատասխանատվություն կրել Վրաստանում ժողովրդավարությունը, մարդու իրավունքները կամ անվտանգությունը խաթարելու կամ վնասելու համար»:
Այս ակտը երկու կողմ ունի: Սա մի կողմից Վրաստանին աջակցելու, տնտեսական կապերը խորացնելու և առանց վիզայի ռեժիմի ներդրման միջոցառումների փաթեթ է, եթե ժողովրդավարական կուրսը, արևմտյան կուրսը շարունակվի։ Իսկ մյուս կողմից՝ սա պատժամիջոցների փաթեթ է։ Այդ պատժամիջոցների մի մասն արդեն ներդրվել է. դրանք հիմնականում վիզային սահմանափակումներն են օրենքի նախաձեռնողների համար։
