Վրացական ոչ կառավարական կազմակերպությունները հայտարարում են, որ չեն ենթարկվի «օտարերկրյա գործակալների մասին» օրենքին։ Թբիլիսիում մեծամասշտաբ բողոքի ակցիայի ժամանակ ընթերցվեց քաղաքացիական հասարակության կոչը այն բանից հետո, երբ խորհրդարանը հաղթահարեց նախագահի վետոն:

«Վրաց ժողովուրդը հաստատակամորեն պաշտպանում և պաշտպանելու է իր եվրոպական ապագան և երբեք չի համակերպվի ռուսական կրկնկի տակ ապրելուն։ Ռուսական օրենքը մեր երկրում չի գործի: Այն կմնա թղթի կտոր, որին ոչ ոք չի ենթարկվի»:

Ըստ հասարակական կազմակերպությունների՝ օրենքը կոչված է «կոտրել քաղաքացիական սեկտորը»։ Իսկ դրա ընդունմամբ իշխանությունները «միտումնավոր վտանգ են ստեղծել Վրաստանի տնտեսության, միջազգային հեղինակության, հասարակական կարգի և խաղաղության համար»։

Քաղաքացիական հասարակությունը մտադիր է շարունակել բողոքի ակցիան մինչև օրենքը չեղարկվի՝ չնայած «հատուկ ջոկատայինների կողմից ահաբեկելու և ծեծի ենթարկելու փորձերին»։ Միևնույն ժամանակ, հասարակական կազմակերպությունները խոստանում են շարունակել օգնություն ցույցերի ժամանակ բերման ենթարկված ցուցարարներին։

«Մենք պաշտպանելու ենք բոլոր ձերբակալվածներին և բոլոր տուգանվածներին։ Մեր փաստաբանները կպայքարեն դատարաններում ինչպես ներքին, այնպես էլ միջազգային հարթակներում։ Մենք գումար կհավաքենք՝ վճարելու համար՝ Վրաստանում սիրո և ազատության համար պայքարի մեր դեմ կիրառված միմյանց տուգանքները»,- ասված է հայտարարության մեջ։

Չնայած օրենքի մոտալուտ կիրարկմանը, հասարակական կազմակերպությունները նախատեսում են նաև վերահսկել այս աշնանը Վրաստանում կայանալիք խորհրդարանական ընտրությունները։

«Մեր պայքարը տեսնում և աջակցում է ողջ քաղաքակիրթ աշխարհը։ Ռուսական օրենքի ընդունմամբ ընտրությունների դիտորդությունը վտանգի տակ է, բայց մենք՝ Վրաստանի քաղաքացիական կազմակերպություններս, խոստանում ենք պաշտպանել ընտրությունները և յուրաքանչյուր քաղաքացու քվեն։ Մենք ձեզ հետ կլինենք յուրաքանչյուր ընտրատեղամասում և կդիտարկենք՝ պաշտպանելու ազատ և արդար ընտրությունները»,- ասված է նրանց հայտարարության մեջ։

Վրաստանի խորհրդարանը մայիսի 28-ին ընդունել է «Օտարերկրյա ազդեցության թափանցիկության մասին» օրենքը՝ հաղթահարելով նախագահի վետոն։ Ընթացակարգի համաձայն՝ եռօրյա ժամկետում օրենքը կրկին կուղարկվի նախագահին՝ ստորագրության համար։ Եթե պետության ղեկավարը չստորագրի այն հինգ օրվա ընթացքում, ապա օրենքը կստորագրի և կհրապարակի խորհրդարանի խոսնակ Շալվա Պապուաշվիլին։ Այնուհետև օրենքը կհամարվի ուժի մեջ մտած։

Հետո Վրաստանի արդարադատության նախարարությունը 60 օր կունենա «Օտարերկրյա ուժի շահերը հետապնդող կազմակերպությունների» ռեգիստր ստեղծելու համար։

ՀԿ-ները և լրատվամիջոցները, որոնց ֆինանսավորման ավելի քան 20%-ը ստացվում է արտերկրից, պետք է գրանցվեն։ Արտասահմանյան ուժը դա կամ օտարերկրյա պետական մարմին է, կամ ֆիզիկական անձ, որը Վրաստանի քաղաքացի չի հանդիսանում, կամ էլ՝ իրավաբանական անձ, որը ստեղծվել է ոչ Վրաստանի օրենսդրության հիմքով։ Ռեգիստրում ընդգրկված կազմակերպություններից պահանջվելու է տարեկան եկամուտների և ծախսերի հայտարարագրեր ներկայացնել:

Լրատվամիջոցների և ՀԿ-ների մասին օրենքը չպահպանելը հղի է 10 հազարից մինչև 25 հազար լարի տուգանքնով։ Ուշացված հայտարարագրման յուրաքանչյուր ամսվա համար՝ 20 հազար լարի։