Արդեն մի քանի օր է Ախալքալաքի Ազատության փողոցում իրականացվում է ճանապարհների փոսային աշխատանքներ։ Աշխատանքները իրականացնում է «ՋավախԱվտոԳզա» ընկերությունը։
«Աշխատանքները սկսել ենք և քաղաքապետարանի կողմից ստացել ենք հրահանգներ, քաղաքի կենտրոնում նույնպես պետք է իրականացնենք աշխատանքներ։ Ինչ որ հրահանգում է քաղաքապետարանը, մենք այդպես անում ենք», – ասաց «ՋավախԱվտոԳզա» ընկերության ներկայացուցիչը։
Ինչ վերաբերվում է Չարենց-Նալբանդյան խաչմերուկին, որը 2023 թվականին փորվեց Energo Pro Georgia ընկերության կողմից, որի նպատակն էր նոր ստորգետնյա էլեկտրահաղորդման գծի կառուցումը, այդ հատվածը նույնպես կասֆալտապատվի։
Ասֆալտապատող ընկերության ներկայցուցիչն այդ խաչմերուկի վերաբերյալ ասաց, որ այդ աշխատանքները նույնպես իրենք պետք է իրականացնեն, և մոտավոր 3-5 օրվա ընթացքում ավարտին կհասցնեն։
Հատկանշական է այն փաստը, որ «ՋավախԱվտոԳզա» ընկերությունը ճամապարհների վերականգնողական աշխատանքները սկսել է իրականացնել գիշերվա ժամերին, երբ տրանսպորտային միջոցների երթևեկությունը պասիվ է։ Անցած տարիներնին ասֆալտապատման աշխատանքների ընթացքում կենտրոնական փողոցները փակում էին ժամերով, կամ դժվարանցանելի էր դառնում։
Նշենք, որ «ՋավախԱվտոԳզա» ընկերությունն այս աշխատանքներն իրակավացնում է անցած տարվա հայտարարած էլեկտրոնային մրցույթից տնտեսված գումարով։
