Ախալքալաքի գյուղեր տանող բոլոր ներքին ճանապարհները կամ փակ են, կամ դժվարանանցանելի։ Ինչպես հայտնում են Ախալքալաքի քաղաքապետարանից՝ իրենց անընդհատ ծանուցում են ճանապարհների անանցանելիության մասին։
Փակ են Ազավրեթ, Չունչխա, Կարծախ, Աբուլ և շատ այլ ուղղություններ։ Ըստ քաղաքապետարանի վերահսկողության վարչության պետ Արմեն Մղդեսյանի՝ կան ճանապարհներ, որտեղ հնարավոր է վարել միայն բարձր անցանելիությամբ մեքենաներով (ջիպերով), կան ճանապարհներ, որտեղ հիմնականում անհնար է կամ շատ դժվար է անցնել։ Քաղաքապետարանը խորհուրդ է տալիս թեթև մարդատար ավտոմեքենաներով տնից դուրս գալ միայն ծայրահեղ անհրաժեշտության դեպքում:
Այս պահի դրությամբ ճանապարհները ձյունից մաքրելու համար տարբեր ուղղություններով աշխատում է 3 գրեյդեր, երկու K700 և մեկ խոշոր ձնահավաք տեխնիկա։
«Չնայած մենք անընդհատ մաքրում ենք, բայց իմաստ չունի, այսօր քաղաքի ճանապարհները մաքրվել են, բայց արդեն նորից լցվել են ձյունով: Մինչև եղանակը չհանդարտվի, այս խնդիրը լինելու է»,- ասում է Արմեն Մղդեսյանը։
