Հոկտեմբերի 18-ին խորհրդարանն առաջին ընթերցմամբ ընդունել է «Հեռարձակման մասին» օրենքում փոփոխությունները։ Օրենսդրական փոփոխություններն ընդլայնում են Հաղորդակցության ազգային հանձնաժողովի լիազորությունները՝ կարգավորելու «ատելություն հրահրելու» հարցը։ Գործող «Հեռարձակման մասին» օրենքի 55.2 հոդվածը նախատեսում է լրատվամիջոցների ծառայություններ մատուցողի հաղորդումներում կամ գովազդում ատելության խոսքի և ահաբեկչության կոչերի տարածման արգելքը։ Գործող օրենքի համաձայն՝ լրատվամիջոցներն իրենք են արձագանքում խախտումների փաստերին՝ ԶԼՄ-ների ծառայություններ մատուցողի ինքնակարգավորման մեխանիզմի շրջանակներում, որոշումը չի կարող բողոքարկվել ո՛չ դատարանում, ո՛չ էլ Հաղորդակցության հանձնաժողովում։ Փոփոխությունների ընդունմամբ, սակայն, ցանկացած ոք կարող է բողոք ներկայացնել հանձնաժողով։
Ատելության խոսքի և ահաբեկչության կոչերի արգելքը խախտող հեռարձակողները նախ նախազգուշացում կստանան։ Մեկ տարվա ընթացքում նմանատիպ խախտումը կրկնելու դեպքում նշանակվում է տուգանք՝ վերջին մեկ տարվա եկամտի 0,5 տոկոսի չափով՝ 2500 լարիից ոչ պակաս։ Նմանօրինակ մեկ այլ խախտման դեպքում տուգանքի չափն ավելանում է։
Օրինագիծը քննարկվում է արագացված կարգով։
Բացի այդ, օրենքի փոփոխություններով ավելացվելու է անպարկեշտությունն արգելող կետ.
«Արգելվում է պոռնոգրաֆիայի, ինչպես նաև անձի և քաղաքացու արժանապատվությունն ու հիմնարար իրավունքները ոտնահարող և անպարկեշտ արտահայտություններ պարունակող ցանկացած հաղորդում ու գովազդ տեղադրելը»,- ասվում է օրինագծի փոփոխված տարբերակում։
Տարածաշրջանային հեռարձակողների ասոցիացիայի տնօրեն Նաթիա Կուպրաշվիլիի խոսքով, նախատեսվող փոփոխություններն «անորոշ են»։ Եթե օրենսդրական փոփոխությունը մեկնաբանվի այնպես, որ Հանձնաժողովը կարողանա դատական վարույթ հարուցել հեռարձակողի դեմ և հատուկ դեպքերում պատժամիջոցներ կիրառել, դա կարող է դառնալ քննադատաբար տրամադրված լրատվամիջոցներին պատժելու մեխանիզմ։
«ԶԼՄ-ների շահերի պաշտպանության կոալիցիա» ՀԿ-ը նույնպես մտահոգություն է հայտնել կարգավորողի ձեռքում լրացուցիչ լիազորությունների կենտրոնացման վերաբերյալ՝ նշելով, որ դա մեծացնում է դրանց չարաշահման ռիսկը։ Կոալիցիան կոչ է անում իշխանություններին չմտցնել ԶԼՄ-ների հետ կապված օրենսդրական փոփոխություններ՝ առանց հեռարձակողների հետ խորհրդակցելու և առանց լայն կոնսենսուսի, որը պահանջվում է Եվրոպական տեսալսողական մեդիա ծառայությունների մասին դիրեկտիվով:
Նախաձեռնված օրինագիծը քննադատության է ենթարկվում նաեւ ընդդիմադիր դաշտում, օրինակ, «Լելո» կուսակցության առաջնորդներից Սալոմե Սամադաշվիլին հայտարարել է.
«Մինչ նրանք մեզ ցույց էին տալիս «Մեծ կրկեսավրան» իմփիչմենթի մասին, նրանք (մեծամասնության ներկայացուցիչները) նաև գրաքննության նոր օրենք մտցրին խորհրդարան։ Միևնույն ժամանակ նրանք մեզ խոստանում են, որ Պուտինի պես հավերժ կմնան իշխանության ղեկին և փորձում են «խցանել ազատության բոլոր ճեղքերը»։ Իսկ մենք՝ գերված երևակայական տեսարանով, զրկված ենք ժողովրդավարական երկրում ապրելու հնարավորությունից»,- գրել է Սամադաշվիլին սոցցանցում։
Աղբյուրը՝ sova.news
