2024 թվականին Վրաստանի բնակչության համընդհանուր մարդահամար կանցկացվի, մեկ հասցեում 12 ամսից ավելի բնակվող անձինք կհամարվեն Վրաստանի «մշտական բնակիչներ», այդ թվում՝ միգրանտները, հայտնում է «Mtavari»-ն:
Ազգային վիճակագրական ծառայության գործադիր տնօրեն Գոգիտա Թոդրաձեն «Mtavari»-ին ասել է, որ մարդահամարի մեթոդաբանությունն է՝ նկարագրել տվյալ պահին երկրի տարածքում բնակվող բոլոր անձանց:
«Այդ թվում՝ նրանք, ովքեր 6 ամսից ավելի այստեղ են ապրում, կամ մի քանի օրով գտնվում են հանրապետությունում, կամ հակառակը, ժամանակավորապես արտերկրում են գտնվում։ Ինչ վերաբերում է միգրանտներին, եթե անձը կոնկրետ հասցեում բնակվում է 12 ամսից ավելի, նա կհամարվի մշտական բնակիչ՝ անկախ նրանից, թե որ երկրից է եկել»,- ասել է Թոդրաձեն։
Բնակչության մարդահամարի համար հատկացվել է մոտ 29 մլն լարի։
Վրաստանում բնակչության վերջին մարդահամարն անցկացվել է 2014 թվականին։ Այդ ժամանակ երկրի բնակչությունը կազմում էր 3 713 804 մարդ։