Ռուսական «Վագներ» մասնավոր ռազմական ընկերությունը գրավել է Ռոստովի ռազմական օբյեկտները, այդ թվում՝ օդանավակայանը։ Ռուսաստանի մայրաքաղաքում, ինչպես նաև Մոսկվայի և Վորոնեժի մարզերում հակաահաբեկչական ռեժիմ է հայտարարվել։ Այս մասին հայտնում է ՌԴ Ազգային հակաահաբեկչական կոմիտեն։
Վորոնեժի և Ռոստովի մարզերի նահանգապետերի խոսքով՝ մարզերում զանգվածային միջոցառումները չեղյալ են հայտարարվել։ Հաղորդվում է, որ ավտոճանապարհին խցանումներ են։ Մարզպետները բնակչությանը հանդարտության կոչ են անում:
Ռուսական «Վագներ» մասնավոր ռազմական ընկերության հիմնադիր Եվգենի Պրիգոժինն ասում է, որ իր մարտիկները գրավել են Ռոստովի ռազմական օբյեկտները, այդ թվում՝ օդանավակայանը։ Այս մասին նա հայտնել է տեսաուղերձում։
Ինչպես նշում է Պրիգոժինը տեսաուղերձում, նա այս պահին գտնվում է Ռոստովում՝ ռազմական շտաբում։
«Մենք շտաբում ենք։ Առավոտյան ժամը 07:30-ն է։ Ռոստովի ռազմական օբյեկտները, այդ թվում՝ օդանավակայանը, գտնվում են մեր վերահսկողության տակ։ Ինքնաթիռները, որոնք մարտնչելու են գնում, աշխատում են ըստ ժամանակացույցի: Բժշկական ինքնաթիռներ են թռչում: Խնդիրներ չկան։ Մենք վերահսկողություն ենք սահմանել, որպեսզի մարտական ավիացիան հարվածներ հասցնի ոչ թե մեզ, այլ ուկրաինացիներին։ Կառավարման գլխավոր շտաբն աշխատում է լրիվ դրույքով։ Ոչ մի խնդիր չկա»,- ասել է Պրիգոժինը։
Եվգենի Պրիգոժինը պահանջում է, որ ՌԴ պաշտպանության նախարար Սերգեյ Շոյգուն և գեներալ Վալերի Գերասիմովը գնան Ռոստով և հանդիպել իրեն։ Նրա խոսքով՝ ռուսական ռազմական ղեկավարությունը թաքցնում է Ուկրաինայում կորուստների մասին տեղեկությունները։
«Տարածքների զգալի մասը կորել է։ Սպանված զինվորների թիվը 3-4 անգամ ավելի է, քան ղեկավարությանը տրամադրված փաստաթղթերը։ Կորուստները որոշ օրերում կազմում են հազար մարդ։ Սա ներառում է սպանվածներին, անհայտ կորածներին, վիրավորներին և նրանց, ովքեր հրաժարվում են կռվել ոչ թե այն պատճառով, որ վախենում են, այլ այն պատճառով, որ այլ ելք չունեն՝ նրանք զինամթերք չունեն, չունեն հրամանատարություն»,- ասել է Պրիգոժինը։
Հիշեցնենք, որ Եվգենի Պրիգոժինը Ռուսաստանի ռազմական ղեկավարությանը մեղադրել էր իր մարտիկների ճամբարների վրա հարձակումներ իրականացնելու մեջ, ինչը ՊՆ-ն հերքում է։ Պրիգոժինն ասել է, որ մտադիր է կասեցնել «երկրի ռազմական ղեկավարության կողմից իրականացվող չարիքը»։ Նրա խոսքով, ինքը «ոչնչացնելու է ցանկացած ինքնաթիռ և բոլոր ճանապարհային արգելափակոցները, որոնք փակում են ճանապարհը»: Պրիգոժինի խոսքով՝ ինքը իր տրամադրության տակ ունի 25 հազար մարտիկ, և կոչ է անում բոլոր ռուսներին, ովքեր ցանկանում են միանալ իրենց, այդ թվում՝ կանոնավոր բանակի զինծառայողներին։ ՌԴ Անվտանգության ծառայությունը քրեական գործ է հարուցել Եվգենի Պրիգոժինի դեմ՝ ռազմական ապստամբություն հրահրելու մեղադրանքով։
