Ախալքալաքի երաժշտական դպրոցի հանրաճանաչությունը տարեցտարի աճում է, քանի որ դպրոցի տաղանդավոր սաները նվաճում են միջազգային ասպարեզներ, բայց պայմանները, որոնցում տաղանդները բացահայտվում են ուսուցիչների շնորհիվ, գնալով խամրում են, սահմանափակվում և վատանում: Ախալքալաքի տեղական իշխանությունները խոստանում են շենքը վերանորոգել այս տարի։
Երաժշտական դպրոցը գտնվում է Ախալքալաքի հենց սրտում՝ քաղաքի հնագույն տներից մեկում, որը ժամանակին պատկանել է Օհանջանյանների ընտանիքին, այս ընտանիքի ժառանգներն, ըստ երաժշտական դպրոցի տնօրենի, ապրում են Կանադայում։ Սկզբում շենքում եղել է փոստային բաժանմունք, այնուհետև բացվել է երաժշտական դպրոց։ Այն, որ հին շենքը խնամքի ու վերանորոգման կարիք ունի, Jnews-ը բազմիցս գրել է:
Չնայած այն հանգամանքին, որ դպրոցը գտնվում է նման վիճակում, այնուամենայնիվ քաղաքային այն հաստատություններից է, որը շատ լավ արդյունքներ է տալիս (սպորտից հետո): Վրաստանում Ախալքալաքի երաժշտական դպրոցի մասին սկսել են իմանալ 2012 թվականից, երբ սկսեցին հրավիրել համերգների և փառատոների։
«Բոլորը գալիս են ու ասում, որ ուզում են նվագել Անահիտ Ստելմաշովայի պես: Հանրաճանաչությունը մեծացել է, կոնտինգենտը մեծացել է, բայց դպրոցը նույնն է։ Հանրային ելույթների շնորհիվ ավելի շատ հնարավորություններ կան, մինչ այդ մենք նույնիսկ չգիտեինք, թե ինչ մրցույթներ են անցկացվում: 2012 թվականից սկսել ենք ծանոթանալ և մասնակցել տարբեր մրցույթների։ Մեր մասին իմացան և սկսեցին հրավիրել»,- ասում է Սվետլանա Կարոյանը՝ ցույց տալով, թե երաժշտական դպրոցում որտեղ ինչ կա։
Չնայած դպրոցի հանրաճանաչությանն ու արդյունավետության, այստեղ զարգանալու համար շատ բան է պակասում:
«Երաժշտական դպրոցում քիչ են բաժինները, կուզենայի ունենալ ջութակի բաժին, լարային գորիքների բաժին, վոկալի բաժին, այս ամենը փոխկապակցված է զարգացման հետ։ Ուսուցիչները նույն կազմն են, չեն ուզում գնալ, հիմա միայն Արսենը, Անահիտն ու Լերոչկան են, բայց չեմ կարծում, որ նրանք կվերադառնան մեր դպրոց, քանի որ մեծ բեմում նվագելու հեռանկարները մեծ են։ Լավ է, որ այս մրցույթները կան, երեխաները դուրս են գալիս, ծանոթանում, շփվում, դա նույնպես շատ կարևոր է»,- ասում է Սվետլանա Կարոյանը։
«Գուցե սխալ վերաբերմունք է մշակույթի, արվեստի նկատմամբ։ Ասացին, որ ամբողջ դպրոցը կվերանորոգեն, նույնիսկ այգին կվերածվի մի քանի դասասենյակի ու կընդլայնվի։ Մենք ՏԻՄ մարմիններին դիմել ենք նաև գրավոր, և այն ժամանակ երբ եկել են ստուգման: Մենք չունենք բավարար պայմաններ, մեզ պետք է մեծ համերգասրահ, որ տեղավորի առնվազն 200-300 մարդ: Ավելի շատ մարդիկ և դասական երաժշտության ավելի մեծ հանրաճանաչություն, ցանկությունն էլ մեծ կլինի։ Գործիքների կարիք դեռ կա: Էլեկտրոնայինով չես կարող արտահայտել այն, ինչ կարող ես արտահայտել ակուստիկով, դա բոլորովին այլ հարց է, նրանք կենդանի են, ինչպես մարդկային ձայնը: Իհարկե, մենք կարող ենք երաժշտություն լսել, բայց շատ ենք ուզում, որ նման տեխնիկական սարքավորում օպերա նայենք, սիմֆոնիա լսենք և այլն»,- ասում է Սվետլանա Կարոյանը:
Չնայած պայմաններին, արդյունավետությունն ազդեց նաև երաժշտական դպրոցի հանրահռչակմանը։ Այստեղ սովորում է 165 ուսանող։ Իսկ 2022-2023 ուստարում առաջին դասարան է ընդունվել 42 երեխա, մինչ այդ 20-28 աշակերտ էր։ Իսկ ահա ուսուցիչների թիվը նվազել է 5-ով, դպրոցում աշխատում է 25 մարդ։
Տեղի իշխանությունների խոսքով, պատմական շենքն այս տարի կվերանորոգվի, շենքի վերանորոգման նախագիծն արդեն նախապատրաստվում է։
«Արդեն նախագիծ ունենք, նախորդ շաբաթ եկան նախագծողները, խոսեցինք երաժշտական դպրոցի ղեկավարության հետ, ծանոթացանք խնդիրներին, դիմումը ստացել ենք, ուղարկել ենք նախագծման: Շենքի ճակատային հատվածը ձեռք չենք տա, հետնամասում, որտեղ քանդված է կվերանորոգվի: Վերանորոգումն այս տարի կիրականացվի: Այս հարցը հաջորդ ամիս կներկայացվի Սակրեբուլոյի քննարկմանը, որից հետո էլեկտրոնային մրցույթ կհայտարարվի», – ասաց Ախալքալաքի քաղաքապետ Մելքոն Մակարյանը։
