Ախալքալաքում հանդիսավորությամբ նշվեց Վրաստանի Անկախության օրը։ Խաս Բախչա կենտրոնական զբոսայգում կազմակերպվել էր բեմ, երեխաների համար տարբեր զվարճանքներ, տեղական արտադրության ապրանքների տոնավաճառ և շատ ավելին։
Ելույթներով են հանդես եկել Սամցխե-Ջավախքի փոխնահանգապետերը, ինչպես նաև Ախալքալաքի մունիցիպալիտետի քաղաքապետ Մելքոն Մակարյանը։ Վերջինս շնորհավորել է բոլոր բնակիչներին տոնի առթիվ և խաղաղ երկինք մաղթել։
Ժամը 14:00-ից բեմում ելույթներ են ունեցել տեղի արտիստներ և համույթներ՝ Անի Թորոսյանը, դհոլիստների անսամբլը, «Մուրջի» համույթը, «Ջավախեթի» համույթը, Ռոման Չնավայանը, «Ջավախք» համույթը, Ալֆոն Կուլախսզյանը, միջնակարգ դպրոցի երգչախումբը։
Երեխաների համար կազմակերպվել էին ժամանցային ակտիվություններ, մարզահրապարակներ, ծեփագործությամբ զբաղվելու, շաշկի ու շախմատ, բասկետբոլ խաղալու վայրեր։ Այգու շրջակայքում տեղակայված էր ռազմական տեխնիկայի ցուցադրությունը։
Ժամը 17:10-ին հանդիսավոր կերպով հնչեց Վրաստանի օրհներգը, երկինք արձակվեցին ծխային ռումբեր՝ Ուկրաինայի դրոշի գույներով, որից հետո համերգով հանդես եկան Թբիլիսիից հրավիրված արտիստներ Նոդիկո Տատիշվիլին, Սոֆո Գելովանին, Դաթունա Մգելաձեն, դուետ «Georgia»-ն։
