Թուրքիայում կայացած նախագահական և խորհրդարանական ընտրությունների վերջնական արդյունքները կհրապարակվեն մայիսի 19-ին։ Ըստ թուրքական պետական «Անադոլու» գործակալության՝ հաշվվել է ընտրատեղամասերի ավելի քան 98 տոկոսը։ Բոլոր ընտրատեղամասերի տվյալների մշակման արդյունքում գործող նախագահ Ռեջեփ Թայիփ Էրդողանը ստացել է ձայների 49,35%-ը։
Նա ստացել է ավելի քան 26 միլիոն ձայն։ Միաժամանակ Էրդողանը պարտվում է երեք խոշոր քաղաքներում՝ Անկարայում, Իզմիրում և Ստամբուլում։
Ընդդիմության միասնական թեկնածու Քեմալ Քըլըչդարօղլուն ստացել է ընտրողների 45%-ի աջակցությունը: Նա ստացել է ավելի քան 23 միլիոն ձայն։ Երրորդ տեղում Սինան Օգանն է՝ 5,28%։ Նրան աջակցել է ավելի քան երկու միլիոն ընտրող։
Առաջին փուլում հաղթելու համար թեկնածուներից մեկը պետք է ստանար 50% գումարած մեկ ձայն։
Ինչ վերաբերում է խորհրդարանական ընտրություններին, ապա Էրդողանի «Արդարություն և զարգացում» կուսակցությունն այժմ օրենսդիր մարմնում կունենա 266 պատգամավոր։ Իշխող կուսակցության արդյունքը նախորդ ընտրությունների համեմատ վատացել է, սակայն կոալիցիոն գործընկերների հետ Էրդողանը նոր խորհրդարանում կունենա 323 պատգամավոր և կպահպանի մեծամասնությունը։
Թուրքիայում ձայների հաշվման գործընթացը շարունակվում է: Կուսակցությունները պետք է մինչև մայիսի 16-ը բողոքարկեն արդյունքները շրջանային հանձնաժողովներում, որոնք քննարկվում են Բարձրագույն ընտրական խորհրդի անդամների կողմից։ Նախագահական և խորհրդարանական ընտրությունների վերջնական արդյունքները կհրապարակվեն մայիսի 19-ին։ Եթե այս արդյունքները չփոխվեն, երկրում կանցկացվի նախագահական ընտրությունների երկրորդ փուլ, որը կկայանա մայիսի 28-ին։