Մարտի 18-ից սկսած Վրաստանում 300-ից ավելի խրոնիկական դեղամիջոցների համար գործում են ռեֆերենտ գներ։ Այս մասին հայտնում է Վրաստանի առողջապահության նախարարությունը։
Գերատեսչության տվյալներով՝ ընդհանուր առմամբ գնի վերին շեմն արդեն գործում է ավելի քան 1100 դեղամիջոցի համար։
Առողջապահության նախարարության տվյալներով՝ առաջիկայում նշված դեղերի ցանկն ավելի կընդլայնվի:
«Բարեփոխման նպատակը երկրում դեղորայքի ինքնարժեքի նվազեցումն է։ Ըստ փոփոխության՝ դեղագործական ընկերությունները պետք է առաջնորդվեն սահմանված գներով։ Եթե դեղատները նշված գնից թանկ դեղեր վաճառեն, կտուգանվեն։
Բնակչության համար դեղերի հասանելիությունը մեծացնելու նպատակով պետությունը սահմանել է խրոնիկական և ուռուցքաբանական դեղամիջոցների գնի առավելագույն սահմանաչափ, որից բարձր դրանց վաճառքն արգելված է։ Փոփոխության արդյունքում դեղագործական արտադրանքի գինը կնվազի միջինը 40 տոկոսով։ Ռեֆերենտային գնագոյացման մեխանիզմը աստիճանաբար կներդրվի նաև դեղերի այլ խմբերի համար»,- նշված է նախարարության հաղորդագրության մեջ։