Վրաստանի և Հայաստանի Հանրապետության քաղաքացիները դեռևս չեն կարող սահմանը հատել նույնականացման (ID) քարտերով: Այսօր Վրաստանում ՀՀ դեսպանատունը պարզաբանող հայտարարությամբ է հանդես եկել:
«27-ին ԶԼՄ-ներում տեղեկատվություն է տարածվել Վրաստանի կողմից «Հայաստանի Հանրապետության և Վրաստանի միջև երկու պետությունների քաղաքացիների համար փոխադարձ առանց մուտքի արտոնագրի ճամփորդելու մասին» համաձայնագրի վավերացման մասին, որը Հայաստանի և Վրաստանի քաղաքացիների համար պետք է հնարավորություն ստեղծի հատել հայ-վրացական սահմանը նույնականացման (ID) քարտերով։
Տեղեկացնում ենք, որ խոսքը գնում է Վրաստանի կողմից համաձայնագրի վավերացման մասին։ Համաձայնագիրն ուժի մեջ կմտնի Հայաստանի Հանրապետության ներպետական վավերացման գործընթացի ավարտից հետո», — նշված է տարածած հաղորդագրության մեջ:
Ընդգծենք, որ երեկ՝ հունվարի 27-ին, մի շարք լրատվամիջոցներ գրել են, որ Վրաստանն արդեն վավերացրել է «Հայաստանի Հանրապետության և Վրաստանի միջև երկու պետությունների քաղաքացիների համար փոխադարձ առանց մուտքի արտոնագրի ճամփորդելու մասին» համաձայնագիրը:
