Կորոնավարակի նոր «կրակեն» ենթատեսակը տարածվում է շատ արագ: Թբիլիսիում արդեն «կրակենով» վարակման դեպքեր են հաստատվել: Ախալքալաքում ամանորից հետո կորոնավարակի դեպքեր չեն հաստատվել, սակայն շատ տարածված է սուր շնչառական վիրուսային վարակները։
Սուր շնչառական վիրուսային վարակներից հիմնականում տարածված է ռինովիրուսը կամ ադենովիրուսը։
«Կորոնավարակի դեպքեր չունենք, սակայն բնակչության մեծ մասը հիվանդ է: Ախտանիշները նույնն են՝ ջերմություն, մարմնի ցավ և այլն», – ասում է Ախալքալաքի առողջապահության կենտրոնի տնօրեն Սիրանուշ Տոնականյանը։
Տոնականյանը հիշեցնում է, որ հիմա շատ տարածված է կորոնավարակի «կրակեն» ենթատեսակը, ինչի պատճառով պետք է շատ զգույշ լինել:
«Եթե մեկ մարդ հիվանդ լինի «կրակենով» և դուրս գա մարդաշատ վայրեր, ապա նա կարող է վարակել բոլորին, վարակը շատ արագ է տարածվում: «Կրակենով» վարակման դեպքեր Ախալքալաքում դեռ չի հաստատվել», – ավելացնում է Առողջապահության կենտրոնի տնօրենը:
Մասնագետը հորդորում է վարակների դեմ պայքարելու համար կարևոր է շնչադիմակ կրել, և անպայման լվացվել ամեն անգամ և օգտագործել հակավիրուսային միջոցներ:
