Jnews-ը շարունակում է «Խորհուրդներ մասնագետի կողմից Jnews-ում» հաղորդումների շարքը։ Ատամնաբույժ Լևոն Բիչախչյանը կպատմի, թե ինչպե՞ս պետք է հետևել բերանի խոռոչի հիգիենային, ո՞ր մթերքներն են առավել վնասակար ատամների համար, ինչպե՞ս ճիշտ ընտրել ատամի խոզանակը և շատ ավելիի մասին։
Նա, մասնավորապես, խորհուրդ է տալիս.
– Պարբերաբար մաքրել բերանի խոռոչը՝ ոչ միայն ատամները, այլև այտերի ու լեզվի մակերեսը, որտեղ նույնպես կուտակվում են բազմաթիվ բակտերիաներ։ Բերանի խոռոչի հիգիենայի ոչ պատշաճ խնամքի դեպքում առաջանում է կարիես, որը ներթափանցում է էմալ և դենտին ու առաջացնում նյարդերի բորբոքում:
– Զերծ մնալ չափազանց քաղցր, աղի և կծու մթերքների հաճախակի օգտագործումից, ինչպես նաև գունավոր ըմպելիքներից, որոնք վնասում են ատամի էմալը:
– Եթե կոնկրետ խնդիր չունեք, ինչպիսին է լնդերի բորբոքումը, Դուք պետք է օգտագործեք միջին կոշտության ատամի խոզանակներ: Որոշ հիվանդությունների առկայության դեպքում ձեր ատամնաբույժը կնշանակի համապատասխան խոզանակ:
– Ատամի խոզանակները միշտ չէ, որ կարողանում են մաքրել բերանի խոռոչը, օրինակ՝ ատամների շփման կետերում, ուստի Լևոնը խորհուրդ է տալիս օգտագործել ատամի թել, որը կարելի է գնել ցանկացած դեղատնից։
