Հայաստանի մաքսային ծառայությունը հանդես է եկել պարզաբանումներով՝ կապված այն տեղեկատվության հետ, որ Ղրիմի կամրջի վրա պայթած բեռնատարը մաքսազերծվել է Հայաստանում, հայտնում է «Նովոստի–Արմենիան»։ Ե՛վ ՌԴ ԱԴԾ-ն, և՛ ՀՀ Պետական եկամուտների կոմիտեն հայտնում են վարորդ Արթուր Թերջանյանի անունը, ով, ըստ Jnews-ի, Ախալքալաքի բնակիչ է։
Ավելի վաղ ռուսական ՏԱՍՍ գործակալությունը, վկայակոչելով Ռուսաստանի Անվտանգության դաշնային ծառայությունից ստացած տվյալները հայտնել էր, որ Ղրիմի կամրջի պայթյունի կազմակերպիչը Ուկրաինայի ռազմական հետախուզության ղեկավար Կիրիլ Բուդանովն է, պայթուցիկները Օդեսայից տեղափոխել են Բուլղարիայի, Վրաստանի և Հայաստանի տարածքով և որ պայթյունի գործով 8 ձերբակալվածներից մեկը ՀՀ քաղաքացի է։
Ռուսաստանի ԱԴԾ-ի տվյալներով՝ 22 770 կգ ընդհանուր քաշով շինարարական պոլիէթիլենային թաղանթով բեռնատարում պայթուցիկ սարք է թաքցվել, որը գտնվել է «ԳՈՒ ԱՐ ԳՐՈՒՊ» ՍՊԸ-ի (Հայաստան, Ալավերդի) հաշվեկշռում, որն օգտագործվել է փչելու համար։
«Ներկայումս քրեական գործի շրջանակներում կալանավորվել են Ռուսաստանի հինգ, Ուկրաինայի և Հայաստանի երեք քաղաքացիներ, որոնք մասնակցել են հանցագործության նախապատրաստմանը», – ասել են ՌԴ Անվտանգության դաշնային ծառայությունից:
Ըստ հաղորդման՝ Հայաստանի քաղաքացին Արթուր Թերջանյանն է՝ ծնված 1985 թվականին: Հայաստանի Պետեկամուտների կոմիտեն ժամեր անց ճշտել է, որ քաղաքացու ազգանունը Թերջանյան է:
Ընդհանուր առմամբ, այժմ բացահայտվել է նախապատրաստման առնվազն 12 մասնակից։
Ղրիմի կամրջի վրա պայթյունը տեղի է ունեցել հոկտեմբերի 8-ի առավոտյան։ Ռուսական կողմի տվյալներով՝ պայթել է բեռնատարը, որն անցնում էր կամրջի վրայով դեպի բռնակցված Ղրիմ։ Դրանից հետո երկաթուղային գնացքի վառելիքի բաքերը հրդեհվել են։ Պաշտոնապես հաղորդվել է, որ երեք մարդ է զոհվել, առանձին Տելեգրամ ալիքներ հայտնել են ևս մեկ մարդու մահվան մասին։ Վլադիմիր Պուտինը կատարվածն ահաբեկչություն է անվանել ու դրանում մեղադրել Ուկրաինայի հատուկ ծառայություններին։ Պաշտոնական Կիևը չի ստանձնել հարձակման պատասխանատվությունը, սակայն մինչ այդ բազմիցս հայտարարել էր, որ Ղրիմի կամուրջին կհարվածի հենց նման հնարավորություն ունենա։
