Ախալքալաքի մունիցիպալիտետի Կումուրդո (Գումբուրդո) գյուղի մանկապարտեզի շինարարությունը, ըստ պայմանագրի, պետք է ավարտվեր 2021 թվականի դեկտեմբերին, սակայն շինարարությունը դեռ չի ավարտվել։ Տուգանք ստանալուց հետո շինարարական կազմակերպությունը ստացել է նոր ժամանակացույց, ըստ որի աշխատանքները պետք է ավարտվեն մինչև 2022 թվականի հունիսի վերջ։ Ընկերությունը շինարարությունն ավարտին հասցնելու համար դեռ շատ անելիքներ ունի։
Jnews-ը երեկ՝ հունիսի 2-ին, այցելել է Կումուրդո գյուղի մանկապարտեզի շինհրապարակ։ Տեղում աշխատում էին 8 բանվոր, այնտեղ էին նաև շինարարական ընկերության երկու ներկայացուցիչները։ Երկու հոգի կառուցում էին կաթսայատան պատը, իսկ շենքի ներսում մի քանի բանվոր աշխատում էին։ Բանվորները տեղացի էին՝ Գումբուրդո գյուղի բնակիչներ:
Շինության պատերը, տանիքը կառուցված են, ներսի հարդարումն ավարտված չէ, տեղադրվում է ջեռուցման համակարգ, սակայն շենքում դռները տեղադրված չեն, առաստաղը ավարտված չէ, հատակածածկը չի արված, ջրագիծն ու կոյուղագիծն անցկացված չեն, սանհանգույցը և խոհանոցը նույնպես պատրաստ չեն, արտաքին երեսպատումը դեռ բացակայում է։ Մանկապարտեզի բակը նույնպես պատրաստ չէ։
Կապալառու «Զենաուրի» ընկերության աշխատանքների մենեջեր Ռոստոմ Գելաձեն ասում է, որ իրենք կհասցնեն ժամանակին ավարտել աշխատանքները, և որ իրենց խանգարել են եղանակային պայմանները:
«Ներսում ամեն ինչ ավարտված է, մնում են արտաքին աշխատանքները, վաղը 20 հոգի կլինի այստեղ և ամեն ինչ կավարտենք: Մեկ շաբաթից սանհանգույցն էլ պատրաստ կլինի, այսօր կավարտենք ջրագիծը: Տեղացիները չկարողացան բարձր որակով կատարել շենքի երեսպատումը: Մենք բանվորներ կբերենք Բաթումիից, և նրանք կշարունակեն»,- ասաց Ռոստոմ Գելաձեն։
Գումբուրդո գյուղում նախակրթարանի շենքը կառուցում է «Նիկա» ՍՊԸ-ն։ Կազմակերպությունը մանկապարտեզի կառուցման տենդերը շահել է 2020թ.-ին: Շենքը պետք է հանձնվեր 2021 թվականի վերջին։ 2020 թվականին տեղական բյուջեով մանկապարտեզի կառուցման համար հատկացվել էր 400 000 լարի, իսկ 2021 թվականին՝ 633 736 լարի, ընդհանուր գումարը կազմում է 1 033 736 լարի։ Ընկերությունը տենդերը շահել է 1 017 000 լարիի չափով։
2021 թվականի նոյեմբերից ընկերությունը դադարեցրել է աշխատանքը, ինչի պատճառով տուգանվել է 15 000 լարիով։
Ախալքալաքի քաղաքապետ Մելքոն Մակարյանի խոսքով, տուգանվելուց հետո իրենք նոր աշխատանքային գրաֆիկ են կազմել, 6 ամիս ժամանակ են տվել շինարարությունն ավարտելու համար՝ մինչև հունիսի վերջ։ Մակարյանն ասում է, որ իրենք կարող էին «Նիկա» ՍՊԸ-ին «սև ցուցակում» ընդգրկել, սակայն քննարկել և որոշել են, որ ավելի լավ է իրենք ավարտեն իրենց գործը, քանի որ կասկածում են, որ կիսատ աշխատանքները կստանձնի շարունակել մեկ այլ ընկերություն։
«Երկու օր առաջ ես այնտեղ էի և տեսա 13 բանվորի, շինանյութով մեքենա: Մենք, օրենքի համաձայն, իրավունք ունենք նրանց տուգանելու, եթե ժամանակին չհասցնեն: Նրանց կոնկրետ ժամկետ ենք տվել, եթե չհասցնեն՝ կտուգանենք և դրանից հետո իրավունք ունենք երկարաձգել ժամկետը, որ և աշխատեն և տուգանքը մուծեն: Մինչև աշխատանքները չավարտեն, գումարը չեն ստանա»,- ասաց Մելքոն Մակարյանը։
Տենդերային փաստաթղթերի համաձայն, «Նիկա» ՍՊԸ-ի աշխատանքները պետք է վերահսկեր անկախ փորձագիտական «Քրիզոլիտ» ընկերությունը։ Այս կազմակերպության ներկայացուցիչ Թոռնիկե Ախվլեդիանին կարծում է, որ ընկերությունը սահմանված ժամկետներում չի հասցնի ավարտել աշխատանքները:
«2 օր առաջ աշխատում էին մի քանի հոգի, բանվորների ղեկավարը ասաց, որ բրիգադ կբերի: Նա ասաց, որ կբերի իր տղաներին, նրանք կավարտեն շինարարությունը: Հինգ օր առաջ էլ մարդ չկար, տեղացիներից երկու հոգի էին աշխատում: Նրանք չեն հասցնի, նրաց նկատմամբ պատժամիջոցներ կան, նրանք գրաֆիկից հետ են մնացել, բայց կարծում եմ, որ ինչ-որ կերպ պետք է ավարտի: Եթե հայտնվի սև ցուցակում, ապա նրա համար դժվար կլինի աշխատել»,- ասաց Թոռնիկե Ախվլեդիանին։
Jnews-ն այս թեմային կանդրադառնա հունիսի վերջին։
