Ալաթուման գյուղի բուժկետը կառուցվել է 2019 թվականին «Օգնություն գյուղին» ծրագրի շրջանակներում: Անցած երեք տարիների ընթացքում բուժկետը ոչ մի անգամ չի օգտագործվել։ Չորս պատերից ներս ոչ կահավորանք կա, ոչ էլ բժշկական սարքավորումներ: Պատկան մարմինները վստահեցնում են, որ շուտով բուժկետը կսկսի գործել:
2019 թվականին «Օգնություն գյուղին» ծրագրի շրջանակներում Ախալքալաքի շրջանին հատկացվել է 922 000 լարի, որից Ալաթումանին է տրամադրվել 16 000 լարի։ Գյուղի մասնագետի և բնակիչների ընդհանուր որոշմամբ, ընտրել են լուծել գյուղի հրատապ հարցերից մեկը, որն էր բուժկետի կառուցումը, որպեսզի այստեղ պատվաստումներ կամ բժշկական առաջին օգնություն կարողանան ցուցաբերել։ Բայց բուժկետն իր նպատակին չի ծառայում:
Շենքը ոչ միայն կահավորված չէ, այստեղ չկա ոչ էլեկտրականություն, ոչ ջուր, ոչ բժշկական սարքավորումներ, և որ ամենակարևորն է՝ ոչ էլ բուժքույր։
Շենքում արդեն խոնավության հոտ է գալիս, այն կամաց-կամաց սկսում է փչանալ։ Սենյակում դրված միակ և հնամաշ սեղանի վրա կորոնավարակի մասին տեղեկատվական պաստառներ են։
Գյուղի նախկին մասնագետ (ներկա դրությամբ նրա պաշտոնավարման պայմանագիրը չի երկարացվել) Մակբեթ Տոնոյանն ասում է, իրենք դիմել են համապատասխան հաստատություններին, սպասում են պատասխանի:
«Ես բազմիցս դեմել եմ քաղաքապետարանին, անգամ Ախալցիխեի «Էվեքս» կլինիկայի գլխավոր բժշկին, քանի որ Թորոյանն (խմբ. Ախալքալաքի հիվանդանոցի մենեջերը) ասաց, որ նրանց է վերաբերում այդ հարցը, սակայն մինչև հիմա սպասում ենք, ասում են հաստիք չունենք: Այսքան տարի է սպասում ենք»։
Համայնքի վեց գյուղից միայն երեքն ունեն բուժքույր: Ինչպես նշում է Տոնոյանը, Բեժանո, Մոդեգամ և Ագանա գյուղերն ունեն բուժաշխատող, իսկ Ալաթումանը, Կաջոն և Սիրկվան՝ ոչ։
«Մենք, որ այս շենքը սարքեցինք, այդ ժողովի ժամանակ գյուղ եկած քաղաքապետի ներկայացուցիչներն ասացին, որ մինչև շենքի շինարարության աշխատանքներն ավարտվեն, իրենք հաստիք կբացեն: Բայց ինչպես տեսնում եք ոչինչ չկա, դիմում հա դիմում ենք»:
Ախալքալաքից 25 կմ հեռավորության վրա գտնվող գյուղի բնակիչները իրենց գյուղի բազմաթիվ խնդիրներից առաջնային են համարում բուժկետի գործելը։ Ալաթումանում 135 տուն կա:
Ալաթումանը մտնում է Կաջո գյուղի վարչական միավորի մեջ: Այս համայնքի քաղաքապետի ներկայացուցիչ Մարտիրոս Մարտիրոսյանն ասում է, որ կահավորանքն ու բժշկական սարքավորումները մոտ մեկ ամսում կլինեն:
«15-20 օրվա մեջ ամեն աշխատանք էլ կկատարվի,ամեն ինչ լավ կլինի, կբացենք ու կաշխատեն։ Ուզում ենք էլեկտրոնային մրցույթ հայտարարել, որպեսզի մնացած անավարտ գործերն ավարտին հասցնենք: Այդ ամենն ուզում ենք «Օգնություն գյուղի» ծրագրի շրջանակներում անել»:
Ալաթուման գյուղի բուժկետն արդյո՞ք կգործի մեկ ամիս անց, ցույց կտա ժամանակը:
Գայանե Ակոջյան
