Դարբինյան փողոցի բնակիչները դժգոհում են, որ այս փողոցում կա՛մ ահռելի, անանցանելի փոսեր են, կա՛մ մեծ քարեր ու փոշի, այն բանից հետո, երբ փորձել էին դրանք փոսալցնել։
Մայիսի 14-ին Դարբինյան փողոցում տրակտորը փոսալցում է կատարել, որոնց առաջացումը մշտական բնույթ է կրում։ Սակայն տրակտորը լցոնել է ոչ թե կոնկրետ փոսերը, այլ ամբողջ փողոցը և այն էլ մեծ խճաքարերով է դա արել։ Անցնող յուրաքանչյուր մեքենա իր հետևից փոշի է բարձրացնում, ինչը մեծապես զայրացնում է այս փողոցի բնակիչներին: Իսկ սալաքարերը, որոնք մնացել են փոսալցումից հետո, զայրացնում է վարորդներին, քանի որ նրանք վախենում են մեքենաները վնասելուց։
«Սա Ախալի քալաքին չէ (խմբ. «նոր քաղաք», Ախալքալաքի տեղանունը վրացերենից թարգմանաբար), սա Ախալի սոփելին է (խմբ.՝ նոր գյուղ): Նույնիսկ գյուղական ճանապարհներն այսպես չեն հարթեցվում»,- ասում է Դարբինյանի բնակիչը, ով անընդհատ փողոցում ջուր է ցանում։
Ինչպես պարզաբանում է Ախալքալաքի քաղաքապետ Մելքոն Մակարյանը, փոսերը լցնելու խնդրանքը եղել է Դարբինյանի բնակիչներից և վարորդներից, ովքեր բողոքում էին անանցանելիությունից։ Թեև, ըստ նրա, այս պահին միայն այս կերպ կարող են լուծել տվյալ խնդիրը, քանի որ այս ճանապարհը գտնվում է Ճանապարհային վարչության հաշվեկշռում և ասֆալտապատվելու է մինչև տարեվերջ:
«Մենք չենք կարող հավելյալ ծախսեր անել, և չենք կարող ստիպել, որ մասամբ վերականգնեն: Այս ճանապարհը պետք է ասֆալտապատել: Սա ընդամենը ժամանակավոր լուծում է: Քանի որ փոսերը խորացել են, այս տարածքի բնակիչները խնդրել են լցնել դրանք։ Մենք խնդրել ենք անմիջապես շինարարներին, ովքեր ներկայումս աշխատում են այս հատվածում: Խնդրանքին համապատասխան այս ճանապարհը փոսալցրել են, որպեսզի որոշ չափով փակեն այդ փոսերը, մինչև ճանապարհն ամբողջությամբ վերանորոգվի»,- ասում է Մելքոն Մակարյանը։
Բանն այն է, որ Դարբինյան փողոցի մի մասը և Ջավախեթյան փողոցը պետք է ասֆալտապատված լինեին դեռ 2022թ.-ին: Վրաստանի Տարածաշրջանային զարգացման և ենթակառուցվածքների նախարարության ճանապարհային դեպարտամենտը 2021 թվականի հուլիսից սկսել է Ախալցիխե-Ախալքալաք ճանապարհի վերականգնման աշխատանքները, որի շրջանակներում այս երկու փողոցները նույնպես պետք է ասֆալտապատվեն մինչև Դարբինյան-Թավիսուփլեբա խաչմերուկ։ Էլեկտրոնային տենդերը շահել է «Ճանապարհաշինության №1 վարչություն»-ը՝ 5 744 000.00 լարիի չափով։ Սակայն ճանապարհի ասֆալտապատումը կասեցվել էր և հետաձգվել մինչև հաջորդ տարի, քանի որ որոշվել էր Ջավախեթյան փողոցում կոյուղային համակարգ անցկացնել, որը նախկինում չի եղել, և փոխել ջրագիծը։ Այս աշխատանքների համար հայտարարվել էր առանձին էլեկտրոնային տենդեր, որը շահել է «Մշենեբլոբա» ընկերությունը՝ 603 700.00 լարի գումարով։ Պայմանագրով աշխատանքները պետք է ավարտվեին 4 ամսում, սակայն ժամկետը մի քանի անգամ հետաձգվել է։ Այժմ ընկերությունն արդեն աշխատում է տուգանքներով, քանի որ բաց է թողել իր վերջնաժամկետները։ Ջավախեթյան փողոցում կոյուղու անցկացման աշխատանքներն ավարտելուց հետո ասֆալտապատումը կվերսկսվի։
Քրիստինե Մարաբյան
