Հասարակություն Ախալքալաք

Երկքաղաքացիություն՝ ինչպես ստանալ այն, որպեսզի չկորցնես Վրաստանի քաղաքացիությունը

---

Արդեն 4 տարի է, ինչ Վրաստանի Սահմանադրությունում կատարված փոփոխությունների համաձայն, վրացական անձնագիր ունեցողներն այլ երկրի քաղաքացիություն ձեռք բերելու դեպքում այլևս չեն զրկվի քաղաքացիությունից։ Այնուամենայնիվ, այլ երկրի քաղաքացիություն ստանալու համար անհրաժեշտ է անցնել որոշակի ընթացակարգեր, որպեսզի չկորցնես Վրաստանի քաղաքացիությունը։

Գործող օրենսդրության համաձայն՝ Վրաստանի քաղաքացիությունը հնարավոր է պահպանել, եթեմինչևօտարերկրյա քաղաքացիություն ստանալը, դիմողը ստանա Վրաստանի իշխանությունների պաշտոնական համաձայնությունը։

Ինչպե՞ս է դա տեղի ունենում:

• Նրանք, ովքեր ցանկանում են ստանալ այլ երկրի քաղաքացիություն (Ջավախքում դա սովորաբար Հայաստանի կամ Ռուսաստանի քաղաքացիությունն է)՝ պետք է դիմեն Արդարադատության տուն: Այնտեղ Դիմորդին կտրամադրվի հատուկ ձևաթուղթ:
• Այն բանից հետո, երբ դիմորդը կլրացնի այդ ձևաթուղթը և բանկում կվճարի 250 լարին՝ մատուցված ծառայության դիմաց, անհրաժեշտ կլինի սպասել 80 օր, սովորաբար պատասխանը ստանալու համար այդքան ժամանակ է պահանջվում:
• Եթե պատասխանը դրական է, այդ դեպքում դիմորդը կարող է հանգիստ դիմել այլ երկրի քաղաքացիություն ստանալու համար, եթե պատասխանը բացասական է, նա վտանգում է կորցնել Վրաստանի քաղաքացիությունը՝ ստանալով այլ երկրի քաղաքացիություն: Պաշտոնական տեղեկություններ չկան դրական և բացասական պատասխանների տենդենցի մասին, սակայն, ըստ Jnews-ի, պատասխանը սովորաբար լինում է 50/50:

Հիմնականում Ջավախքի բնակիչները հեշտությամբ են ձեռք բերում Հայաստանի քաղաքացիություն՝ ելնելով իրենց էթնիկ ծագումից: Իսկ Հայաստանի քաղաքացիություն ստանալու անհրաժեշտությունը գալիս է Հայաստանի և Ռուսաստանի միջև առանց վիզայի ռեժիմից, որտեղ էլ Ջավախքի բնակիչները արտագնա աշխատանքի են մեկնում: Հայաստանի քաղաքացիություն ստանալու գործընթացը սովորաբար տևում է 6 ամիս և ավելի։

Ինչ վերաբերում է ծնունդով այլ երկրի քաղաքացիություն ստացած երեխաներին, ապա նրանք կկարողանան Վրաստանի քաղաքացիությունը պահպանել մինչև 18 տարեկանը։ Դրա համար երեխաների օրինական ներկայացուցիչներն այս խնդրանքով պետք է նախապես դիմեն Վրաստանի իշխանություններին։

Միևնույն ժամանակ, «Քաղաքացիության մասին» Վրաստանի օրենքում փոփոխություններն ուժի մեջ մտնելուց հետո օտարերկրացիների հպատակագրումը շատ ավելի դժվարացավ։ Վրացական անձնագիր ստանալու համար Վրաստանի քաղաքացու ամուսինը կամ կինը պետք է երկրում ապրեն ոչ թե 2 տարի, ինչպես նախկինում էր, այլ առնվազն 5 տարի։ Մնացած դեպքերում հպատակագրման համար անհրաժեշտ բնակության ժամկետը երկարացվել է մինչև 10 տարի (նախկինում դա 5 տարի էր)։

Քաղաքացիություն տրամադրելու չափորոշիչները տարբեր են, սակայն կա երկու պայման, որին պետք է համապատասխանեն բոլոր դիմորդները՝ վրացերենի իմացություն և Վրաստանի պատմություն:

Բացառության կարգով քաղաքացիությունը հասանելի է նաև նրանց համար, ովքեր ներդրումներ են կատարել, ծրագրում են ներդրումներ կատարել Վրաստանում կամ կարևոր ներդրում են ունեցել երկրի տնտեսության զարգացման գործում: Բացառության կարգով քաղաքացիություն կարող է տրվել նաև այն դիմորդներին, ովքեր Վրաստանը համարում են իրենց հայրենիքը կամ/եթե նրանց նախնիները Վրաստանից են:

Քրիստինե Մարաբյան