Վրացական շուկայում հավի մսի գները զգալիորեն աճում են, մասնավորապես, 2021 թվականին այս տեսակի մթերքի թանկացումը կազմել է 12%, սակայն միտումը շարունակվում է 2022 թվականին։ Մասնավորապես, այս տարվա հունվարին հավի միսը թանկացել է։
Ըստ տեղական արտադրողների՝ դրան պատճառ են հանդիսացել միջազգային գործընթացները և թռչնաբուծության ոլորտում օգտագործվող հումքի թանկացումը։
Թռչնաբուծության ասոցիացիայի ղեկավար Զուրաբ Ուչումբեգաշվիլիի խոսքով, տարվա ընթացքում միայն հավի կերի գինը գրեթե կրկնապատկվել է, և դա մեծ բեռ է արտադրողների համար:
«Թռչնաբուծության ոլորտում ծախսերը աղետալիորեն աճել են, ուստի վերջնական արտադրանքը թանկացել է բոլոր արտադրողների համար: Թռչնաբուծության համար անհրաժեշտ բոլոր նյութերը թանկանում են. Օրինակ, եթե մինչ համավարակը հացահատիկը գնում էինք 55-60 թեթրիով, ապա այժմ այն թանկացել է մինչև 1,20 լարի։ Ստեղծված իրավիճակում թանկացումները զսպելը գրեթե անհնար է, քանի որ հավի մսի ինքնարժեքի գրեթե 65-70 տոկոսը անասնակերն է, մնացած ծախսերը չնչին են»,- հայտարարել է նա։
Ըստ նրա՝ այս իրավիճակում թանկացել է բոլոր արտադրողների հավի միսը՝ մեկը թանկացրել է 10%-ով, մյուսը՝ 15%-ով, բայց ոչ մի արտադրող չի կարողացել իրավիճակից դուրս գալ առանց գնաճի։
«Մենք բոլորս գնում ենք նույն հոսքով, և ինչ որ մեկին չենք կարող մեղադրել։ Ամբողջ աշխարհում նման գործընթացներ են տեղի ունենում, կորոնավիրուսը գլխիվայր շուռ է տվել ամբողջ բիզնեսը»,- ասում է Զուրաբ Ուչումբեգաշվիլին։
Գների բարձրացումն ազդել է նաև ձվի արտադրության վրա: Այս հատվածում հումքն էլ ավելի է թանկացել, քան թռչնաբուծության մյուս ճյուղերում։
«Օրինակ՝ ձվի փաթեթավորումը թանկացել է, եթե նախկինում ստվարաթղթե տուփերը, որոնցով ձուն մատակարարվում էր բաշխիչ ցանցին՝ արժեր 1,20 լարի, հիմա՝ 3,20 է, թանկացել է նաև պլաստմասե փաթեթավորումը, որը վերջերս շատ է գործածվում։ Ընդհանրապես, ամեն ինչն է թանկացել, բիզնեսն էլ է հայտնվել շատ ծանր վիճակում, քանի որ գնալով դժվարանում է թանկացած ապրանքը վաճառել»,- ասում է նա։
Ասոցիացիայի ղեկավարի խոսքով, արտադրողները միջազգային շուկաներում սպասում են չնչին փոփոխությունների, որոնք թույլ կտան գների գոնե մասնակի իջեցում սկսել, սակայն մինչ այժմ նման հանգամանքներ ի հայտ չեն գալիս։
Վրացստատի տվյալներով՝ 2021 թվականին հավի մսի գինը 2020 թվականի համեմատ աճել է 11,9%-ով։
Աղբյուրը՝ Bizzone.ge
