Դպրոցական տարածքում ուսումնական գործընթացի վերսկսվելու պես ուսուցիչների և վարչական անձնակազմի թեստավորման գործընթացն ընթանում է ինտենսիվ ռեժիմով,- այս մասին հայտնում են Կրթության նախարարությունում։
Գերատեսչության հաղորդմամբ, Վրաստանի կրթության և գիտության նախարարության աջակցությամբ Հիվանդությունների վերահսկման և հանրային առողջության ազգային կենտրոնի ներկայացուցիչները վերապատրաստել են ավելի քան 400 պետական և մասնավոր դպրոցների բժիշկների։
«Հենց վերապատրաստված բժիշկներն են այս դպրոցներում ապահովում կադրերի թեստավորումը Covid-19-ի համար։ Իսկ այն դպրոցներում, որտեղ բժիշկները դեռ չեն վերապատրաստվել, շարունակվելու է թեստավորման գործընթացը՝ Հիվանդությունների վերահսկման և հանրային առողջության ազգային կենտրոնի կողմից։
Դպրոցներում անվտանգ միջավայրը առավելագույնի հասցնելու համար երկու անգամ պատվաստված կամ բուստերով պատվաստված ուսուցիչները երկու շաբաթը մեկ թեստ են անցնում կորոնավիրուսի համար, իսկ մեկ անգամ պատվաստված կամ չպատվաստված ուսուցիչները շաբաթը մեկ անգամ ստուգվում են արագ հակագենի թեստով:
Մինչ այժմ պատվաստվել է ուսուցիչների և դպրոցի տնօրինության ներկայացուցիչների 73,6%-ը։
Վիրուսը կանխելու համար դպրոցներն ամբողջությամբ ապահովված են համապատասխան ախտահանիչ լուծույթներով, ինչպես նաև ջերմաչափերով և ախտահանող պատնեշներով։
Ուսուցիչների և աշակերտների համար անվտանգ միջավայր ապահովելու նպատակով Կրթության և գիտության նախարարության ներկայացուցիչները շարունակում են մշտադիտարկումը Թբիլիսիի և Վրաստանի բոլոր շրջանների դպրոցներում»,- ասվում է ԿԳ նախարարության հաղորդագրության մեջ։
