Այսօր Ախալքալաքի սակրեբուլոյում Թբիլիսիի հանրապետական հիվանդանոցի Covid բաժանմունքի բժիշկ Նուցա Սորդիան և հանրային առողջության մասնագետ Զուրաբ Ալխանիշվիլին հանդիպում ունեցան Ախալքալաքի գյուղական բուժքույրերի հետ։
Zinknetwork USAID կազմակերպության ֆինանսական աջակցությամբ իրականացվում է Covid-ի դեմ պատվաստման վերաբերյալ հաղորդակցման նախագիծ։
Ծրագրի թիրախային տարածաշրջանը Սամցխե-Ջավախքն է, որտեղ էթնիկ փոքրամասնությունների ներկայացուցիչները չունեն ամբողջական և մանրամասն տեղեկատվություն երկրում առկա պատվաստանյութերի և դրանց կարևորության մասին:
Դեռևս 2021 թվականի նոյեմբերին կազմակերպությունը շրջել է Ախալքալաքի, Նինոծմինդայի և Ասպինձայի 10 գյուղերով և հանդիպել տեղի բնակչության հետ։ Հանդիպումների ընթացքում պատվաստվել է 46 մարդ։
Այս անգամ կազմակերպությունը ժամանել է Ախալքալաք՝ հանդիպելու շրջանի գյուղերի բուժքույրերի հետ։
Այս հանդիպման նախաձեռնողը Ախալքալաքի սակրեբուլոն է, որը ցանկություն է հայտնել, որ տեղի բուժքույրերը ունենան հաղորդակցման և բժշկական սեմինարներ։
Հանդիպումները կկայանան հունվարի 29-ին և 30-ին։ Նախատեսվում է հանդիպել 44 բուժքրոջ։
