Արցախի նախագահ Արայիկ Հարությունյանը «Ջավախքը հայի կողքին» բարեգործական հիմնադրամի նախագահին շնորհակալագիր է հանձնել` Արցախի դեմ սանձազերծված 44-օրյա պատերազմի օրերին և հետպատերազմական շրջանում ցուցաբերած նշանակալի աջակցության, տրամադրված մարդասիրական օգնության համար։
«Ջավախքը հայի կողքին» բարեգործական հիմնադրամը պատերազմի ընթացքում ու դրանից հետո մոտ 500 տոննա սնունդ, մարդասիրական այլ աջակցություն է փոխանցել Արցախին, պատերազմի օրերին օժանդակել Պաշտպանության բանակին։
«Հպարտ ենք և շնորհակալ, որ Արցախի նախագահ Արայիկ Հարությունյանի կողմից նման բարձր գնահատական է տրվում մեր կատարած աշխատանքին։ Լիահույս ենք, որ հետագայում ևս մեր հիմնադրամը կշարունակի գործել համայն հայության նպատակների և նվիրական երազանքների իրագործման համար։
Մենք շարունակելու ենք ուժերի ներածին չափով օգնել մեր հայրենակիցներին, մեր վիրավոր զինծառայողներին, զոհված զինծառայողների ընտանիքներին», – նշել է Հիմնադրամի հիմնադիր-նախագահ Կարեն Պապիկյանը։
Նախագահ Արայիկ Հարությունյանի հետ հանդիպմանը ներկա են եղել «Ջավախքը հայի կողքին» հիմնադրամի նախագահ Կարեն Պապիկյանը, հիմնադիրներից Արտաշես Ուզունյանը, նախաձեռնության այլ աջակիցներ։
