Վրաստանի Գյուղատնտեսության նախարարության մարզային գործակալության վարչության պետ Լաշա Շալամբերիձեն Ախալքալաքի քաղաքապետարանի շենքում հանդիպեց Ախալքալաքի և Նինոծմինդայի մունիցիպալիտետների գյուղերի լիազորների հետ:
Հանդիպումը տեղի է ունեցել հունիսի 24-ին, քաղաքապետարանի նիստերի դահլիճում:
Հանդիպմանը ներկա էին Ախալքալաքի մունիցիպալիտետի քաղաքապետ Յուրիկ Ունանյանը, Սամցխե-Ջավախքի Տեղեկա-խորհրդատվական կենտրոնների մարզային ծառայության ղեկավար Նանա Զուբաշվիլին, Գյուղատնտեսության նախարարության Գյուղի զարգացման գործակալության Վրաստանի Ախալքալաքի և Նինոծմինդայի մունիցիպալիտետների Տեղեկա-խորհրդատվական կենտրոնների գլխավոր մասնագետները:
Հանդիպման ընթացքում Լաշա Շալամբերիձեն ներկաներին մանրամասն տեղեկացրեց այն ծրագրերի մասին, որոնք Գյուղատնտեսության նախարարությունն իրականացնում է շրջաններում, բացատրեց, թե ինչպես գրանցվել https://my.mepa.gov.ge կայքում և որքանով կարևոր է դա Գլուղնախարարության և ֆերմերների համար:
Գյուղատնտեսության նախարարությունը հույս ունի, որ ֆերմերների կայք մուտքագրած տեղեկատվության օգնությամբ, տվյալներ կստանան ֆերմերային տնտեսությունների քանակի, տնկված և ցանված բերքի քանակի, բերքի և գյուղատնտեսության հետ կապված ամեն ինչի մասին՝ կառավարման, կարգավորման և վերահսկման նպատակով:
Կայքի միջոցով նախարարությունը կունենա տվյալների բազա. Որ մարզում ինչ մշակաբույս և ինչ քանակությամբ է աճեցվել, որքան բերք է սպասվում, որքան բերք կա իրացման համար: Գրանցվելով կայքում յուրաքանչյուր ֆերմեր կարող է իրեն հետաքրքրող հարցը տալ և ստանալ պատասխան, ինչպես նաև կարող է տեղադրել լուսանկար և խորհրդատվություն ստանալ գյուղատնտեսական մշակաբույսերի հիվանդությունների և բուժման մեթոդների վերաբերյալ:
Իրազեկումից հետո Լաշա Շալաբերիձեն պատասխանել է նաև ներկաների հարցերին: Հարցերը վերաբերում էին կարտոֆիլի իրացմանը: Հարց տրվեց, թե ինչու են ֆերմերները բախվում կարտոֆիլի իրացման խնդրին և նրանց բերքը հայտնվում է աղբանոցում:
Շալաբերիձեն պատասխանեց, որ կայքը, որտեղ նրանք առաջարկում են ֆերմերներին գրանցվել, կօգնի խուսափել այս խնդրից:
«Եթե այս կայքում Դուք լրացնեք ձեր բերքի քանակի վերաբերյալ տեղեկատվություն, ես այդ տեղեկատվությունը կփոխանցեմ արտահանող ընկերություններին, որոնք հետաքրքրված են դրանով: Ես խնդրում եմ ձեզ մասնակցել այս ծրագրին, որպեսզի մենք հավաստի տեղեկատվություն ունենանք շրջանում կարտոֆիլի քանակի մասին: Ես երկու պատճառ եմ տեսնում, որ մենք չենք կարողանում կարտոֆիլն իրացնել: Առաջին հարվածը ես ստացա, երբ իմացա, որ մեր կարտոֆիլը ցածրորակ է, անորակ, արտահանողները հրաժարվել են այն գնել », – ասաց Լաշա Շալաբերիձեն:
Ըստ Շալաբերիձեի, ֆերմերները պետք է աշխատեն կարտոֆիլի որակը բարելավելու վրա և կարողանան իրենց գյուղմթերքը գեղեցիկ և գեղագիտորեն հրամցնել, ինչպես նաև սկսել այլ մշակաբույսեր աճեցնել և կանգ չառնել միայն կարտոֆիլի վրա:
Հանդիպման ընթացքում բարձրացվեց նաեւ գյուղական վայրերում կայծակի պաշտպանության սարքերի տեղադրման հարցը: Գյուղնախարարության ներկայացուցիչն այս հարցին ի պատասխան ասաց, որ պետությունն ունի գյուղատնտեսական ապահովագրության ծրագիր: Ֆերմերները դժգոհեցին ապահովագրական ընկերությունների վատ աշխատանքից և նշեցին, որ չեն ցանկանում նրանց հետ գործ ունենալ:
Նախարարության ներկայացուցիչն ասաց, որ այս տեղեկատվությունն անպայման կփոխանցի համապատասխան ծառայություններին, իսկ դժգոհության դեպքում խորհուրդ տվեց զանգահարել թեժ գիծ:
Հարցեր հնչեցվեցին նաև 1,25 հա-ից ավելի հողատարածքների սեփականաշնորհման, նաև ոռոգման համակարգի բացակայության վերաբերյալ:
«Մենք մանրամասն պատմեցինք բոլոր այն նախագծերի մասին, որոնք Գյուղնախարարությունն իրականացնում է շրջաններում: Սա շատ կարևոր է համագործակցության նոր փուլի համար: Յուրաքանչյուր տարին իր հետ նոր հնարավորություններ է բերում: Մենք գիտենք բոլոր խնդիրները, Դուք գիտեք, որ բյուջեն սուղ է, բայց մենք փորձում ենք այն ռացիոնալ օգտագործել », – մեկնաբանեց Լաշա Շալամբերիձեն:
