ԵՄ դեղերի գործակալությունը (EMA) հաստատել է Pfizer/BionTech պատվաստանյութը՝ 12-ից 15 տարեկան երեխաներին ներարկելու համար:
Այս մասին գործակալությունը հայտնել է իր կայքում, գրում է «Եվրոպական ճշմարտություն»-ը:
«EMA մարդու համար նախատեսված դեղերի կոմիտեն (CHMP) խորհուրդ է տվել ընդլայնել ցուցումները COVID-19 Comirnaty պատվաստանյութի համար, որպեսզի այն ընդգրկվի 12-ից 15 տարեկան երեխաների շրջանում օգտագործման համար: Պատվաստանյութն արդեն հաստատվել է 16-ից բարձր տարիքի դեռահասների և մեծահասակների օգտագործման համար», – նշվում է գործակալության հաղորդագրությունում:
Comirnaty պատվաստանյութի օգտագործումը 12-ից 15 տարեկան երեխաների համար կլինի նույնպիսին, ինչպիսին 16-ից բարձր տարիքի մարդկանց համար է: Պատվաստանյութը ներարկվում է ուսի մկանների մեջ՝ երկու ներարկման տեսքով երեք շաբաթվա տարբերությամբ:
Comirnaty պատվաստանյութի ազդեցությունն երեխաների շրջանում ուսումնասիրվել է 12-ից 15 տարեկան 2260 երեխաների մոտ: Ուսումնասիրությունը ցույց է տվել, որ այս խմբում Comirnaty-ի նկատմամբ իմունային պատասխանը համեմատելի է 16-25 տարեկան տարիքային խմբի իմունային պատասխանի հետ՝ SARS-CoV-2-ի դեմ հակամարմինների մակարդակի առումով:
Դեղորայքի փորձարկման ժամանակ երեխաները պատվաստանյութ կամ պլացեբո են ստացել՝ առանց իմանալու, թե որ ներարկումն են իրենց կատարել: Պատվաստանյութ ստացած 1005 երեխաներից ոչ մեկի մոտ չի առաջացել COVID-19, ի տարբերություն պլացեբո ներարկած 978 երեխաներից 16-ի:
Սա նշանակում է, որ այս ուսումնասիրության ընթացքում պատվաստանյութը 100% արդյունավետ է եղել COVID-19 կանխարգելման գործում, չնայած իրական ցուցանիշը կարող էր լինել 75%-ից 100%, նշել է EMA-ն:
12-ից 15 տարեկան երեխաների մոտ ամենատարածված կողմնակի ազդեցությունները նույնական են նրանց, ինչը դիտարկվում է 16-ից բարձր տարիքի մարդկանց մոտ: Դրանք են՝ ցավը ներարկման տեղում, հոգնածությունը, գլխացավը, մկանների և հոդերի ցավը, մրսածությունը և տենդը: Այս կողմնակի ազդեցությունները սովորաբար թեթև են կամ միջին և մեղմվում են պատվաստումից մի քանի օրվա ընթացքում:
Կոմիտեն եզրահանգել է, որ Comirnaty-ի օգուտները գերազանցում են այս տարիքային խմբում դիտարկվող ռիսկերը:
