Վրաստանի հայտնի բժիշկներն Ախալքալաքում հանդիպել են Հայ առաքելական եկեղեցու, Վրաց ուղղափառ եկեղեցու ներկայացուցիչների, լրատվամիջոցների ներկայացուցիչների, շրջանի բժիշկների հետ և պատասխանել պատվաստումների հետ կապված նրանց հարցերին:
Այսօր՝ մայիսի 13-ին, Ախալքալաքի «Գրանդ Մուր» սրճարանում կայացավ հանդիպում լրատվամիջոցների, ՀԱԵ ներկայացուցիչների և բժիշկների հետ: Իսկ Ախալքալաքի և Կումուրդոյի թեմում բժիշկները հանդիպեցին վրացի հոգևորականների հետ: Հանդիպումը կազմակերպել էր ՅՈՒՆԻՍԵՖ-ը ԱՄՆ Միջազգային զարգացման գործակալության աջակցությամբ:
Հարցերին պատասխանում էին իմունիզացիայի գծով փորձագետների ազգային տեխնիկական խորհրդատվական խմբի ղեկավար, ԹՊԲՀ պրոֆեսոր, Իաշվիլիի անվան մանկական կենտրոնական հիվանդանոցի կլինիկական տնօրեն Իվանե Չխաիձեն, հայտնի ալերգոլոգ Բիձինա Կուլումբեգովը, սրտաբան Զվիադ Կղիփիանին, Վրաստանի հիվանդությունների վերահսկման կենտրոնի ներկայացուցիչ, գլխավոր համաճարակաբան Խաթունա Զախաշվիլին: Հանդիպմանը ներկա էր նաև Վրաստանում ՄԱԿ-ի մանկական հիմնադրամի (ՅՈՒՆԻՍԵՖ) ղեկավար Հասան Խալիլը:
ՅՈՒՆԻՍԵՖ-ի հաղորդակցման ծրագրի ղեկավար Մայա Քուրդցինաձեն ողջունեց ներկաներին և ներկայացրեց հյուրերին: Այնուհետև հյուրերին ողջունեց ՀԱԵ քահանա Տեր Նարեկ Տիգրանյանը:
Հանդիպման նպատակն էր տեղեկացնել և պատասխանել շրջանի բնակչության հարցերին:
Շրջաններում պատվաստման գործընթացն ակտիվ չէ, հատկապես Սամցխե-Ջավախքում պատվաստվածները շատ քիչ են:
Մայա Քուրդցինաձեի խոսքով, իրենց այցը նպատակ ունի բնակչությանն իրազեկել և ցրել պատվաստումների շուրջ տարածված առասպելները:
«Պատվաստումը կորոնավիրուսի դեմ պայքարի առավել արդյունավետ միջոցներից մեկն է: Նման հանդիպումներ մենք անցկացնում ենք շրջաններում: Պատվաստված մարդիկ Սամցխե-Ջավախքում շատ քիչ են, ուստի որոշեցինք գալ այստեղ: Դժվար էր բոլոր բժիշկներին հավաքել միասին, քանի որ նրանք շատ զբաղված են, բայց մենք կարողացանք հանդիպումը կազմակերպել », – ասաց Մայա Քուրդցինաձեն:
Բժիշկները հակիրճ խոսեցին պատվաստման կարևորության և անհրաժեշտության, երկրում տիրող իրավիճակի մասին:
Սրտաբան Զվիադ Կղիփիանին խոսեց սրտանոթային համակարգի վրա COVID-19- ի ազդեցության մասին: Իվանե Չխաիձեն՝ երեխաների պատվաստման կարևորության և այն մասին, թե ինչպես է ընթանում աշխարհում երեխաների պատվաստման գործընթացը: Բիձինա Կուլումբեկովը բացատրեց, որ ալերգիաներ ունեցողները նույնպես պետք է պատվաստվեն և կարիք չկա վախենալ դրա հետևանքներից: Խաթունա Զախաշվիլին ներկայացրեց երկրում ընդհանուր COVID իրավիճակը և կարևորեց պատվաստման անհրաժեշտությունը:
Վրաստանում ՄԱԿ-ի մանկական հիմնադրամի (ՅՈՒՆԻՍԵՖ) ղեկավար Հասան Խալիլը նույնպես ընդգծեց պատվաստման կարևորությունը և նշեց, թե ինչու են կազմակերպել այս հանդիպումը:
Դրանից հետո սկսվեց հարցուպատասխան ձևաչափը: Հարցերը Վրաստանում օգտագործվող պատվաստանյութերի առավելությունների մասին էին, նաև այն մասին, թե ինչպես պատվաստանյութը ընտրել, արդյոք անհրաժեշտ է հետազոտվել պատվաստումից առաջ և այլն:
Jnews- ը հետաքրքրվեց, թե արդյոք կորոնավիրուսի հնդկական շտամը Վրաստանում գրանցված է լաբորատոր կարգով, և արդյոք պատվաստումն արդյունավետ է կորոնավիրուսի բոլոր շտամերի նկատմամբ:
«Մեր կենտրոնը վերահսկում է այն շտամերը, որոնք շրջանառվում են երկրում: Ներկայումս մեզ մոտ հիմնականում շրջանառվում է բրիտանական շտամը, նաև ավելի հին տեսակը, որը գոյություն ուներ ամբողջ աշխարհում: Պատվաստաբաններն ասում են, որ ներկայիս պատվաստանյութերը ծածկում են բոլոր հայտնի շտամները: Ինչ վերաբերում է հնդկական շտամին, ապա այս շտամի վերաբերյալ շատ հետազոտություններ չկան, քանի որ այն առաջացել է վերջին շրջանում: Հնդիկ բժիշկներն ասում են, որ Հնդկաստանում այժմ արտադրվող պատվաստանյութը ծածկում է հնդկական շտամը: Ոչ 100%, բայց լավ արդյունքներ ի հայտ են եկել », – ասաց Խաթունա Զախաշվիլին:
Վաղը հյուրերը կհանդիպեն Ախալցխայի բժիշկների, ինչպես նաև Սամցխե-Ջավախքի տեղական իշխանությունների ներկայացուցիչների հետ:
