Առողջապահության համաշխարհային կազմակերպությունը խորհուրդ է տվել չինական Sinopharm ընկերության կորոնավիրուսի պատվաստանյութը արտակարգ իրավիճակներում օգտագործման համար: Այս մասին հայտարարել է ԱՀԿ նախագահ Տեդրոս Ադհանոմ Գեբրեյսուսը:
«Այսօր ԱՀԿ-ն ավելացրել է Պեկինի Sinopharm պատվաստանյութը COVID-19-ի դեմ արտակարգ օգտագործման համար առաջարկվող պատվաստանյութերի ցանկում», – ասել է նա:
Sinopharm-ը վեցերորդ պատվաստանյութն է, որը ստացել է ԱՀԿ-ի անվտանգության, արդյունավետության և որակի հավաստագիր:
Առաջինն արտակարգ իրավիճակներում օգտագործման համար ԱՀԿ-ն հաստատել էր գերմանական BioNTech-ի և ամերիկյան Pfizer-ի պատվաստանյութը, որի մասին հայտարարվել էր 2020 թվականի դեկտեմբերի 31-ին: Դրանից առաջ այն գրանցվել էր ԱՄՆ-ի և Մեծ Բրիտանիայի կարգավորիչների կողմից, որտեղ նրանք սկսել էին բնակչության զանգվածային պատվաստումն այս դեղամիջոցով: Երկրորդը և երրորդը բրիտանա-շվեդական AstraZeneca ընկերության և Օքսֆորդի համալսարանի կողմից մշակված պատվաստանյութերն էին: Դրա մի տարբերակն արտադրվում է Հարավային Կորեայում, մյուսը՝ Հնդկաստանում: Մարտի 12-ին ԱՀԿ-ն ցուցակագրել էր Johnson&Johnson պատվաստանյութը, իսկ մայիսի 1-ին` ամերիկյան Moderna ընկերության պատվաստանյութը:
Ըստ Nature գիտական ամսագրի՝ մինչ օրս Sinopharm պատվաստանյութը հաստատվել է աշխարհի ավելի քան 45 երկրների կարգավորող մարմինների կողմից: Կլինիկական փորձարկումների երրորդ փուլի ընթացքում երկու դեղաչափերից հետո դեղամիջոցը ցույց է տվել 79-86% արդյունավետություն:
Կորոնավիրուսի դեմ պատվաստումը Վրաստանում սկսվել էր մարտի 15-ին: Վերջին տվյալների համաձայն՝ պատվաստվել է 54 687 մարդ, որից պատվաստանյութի ամբողջական, երկու դեղաչափերն ընդունել է 8700 քաղաքացի:
Մայիսի 4-ից, 18 տարին լրացած բոլոր քաղաքացիները արդեն նույնպես կարող են ամրագրել Sinopharm պատվաստանյութը: Ընդհանուր առմամբ, այս արտադրողից պատվաստանյութերի 100 հազար դեղաչափ առաքվել է երկիր: Երկրորդ խմբաքանակը՝ 600 հազար դեղաչափ, պետք է ժամանի Թբիլիսի հունիս ամսին:
