Ախալքալաքի հիվանդանոցում վերսկսվել են պլանային վիրահատությունները, այդ թվում՝ աչքի:

Առողջության ընդհանուր ծրագրի շրջանակներում պլանային վիրահատությունների ֆինանսավորումը վերսկսվել է մարտի 1-ից: Այս մասին Վրաստանի Առաջին ալիքին հայտնել էին Առողջապահության նախարարությունից: Ախալքալաքի շրջանային հիվանդանոցում, ինչպես նաև ամբողջ Վրաստանում վիրահատությունները կրկին կֆինանսավորվեն, այդ թվում՝ աչքի վիրահատությունները: Պլանային վիրահատությունները կկատարվեն Առողջապահության նախարարության կողմից հաստատվելուց հետո:

Հիշեցնենք, որ նախորդ տարվա նոյեմբերին՝ երկրում կորոնավիրուսի տարածման պատճառով, դադարեցվել էր Համընդհանուր առողջապահության պետական ծրագրի շրջանակներում պլանային վիրաբուժական ծառայությունների երաշխավորման թերթիկի տրամադրումը: Մինչ այդ, երեք տարվա ընթացքում, Ախալքալաքի հիվանդանոցում ամեն երկու ամիսը մեկ անցկացվում էին աչքի վիրահատություններ: Այդ նպատակով Թբիլիսիից հրավիրվում էին ակնաբույժներ: Ախալքալաքի հիվանդանոցում կատարվում էին այնպիսի վիրահատություններ, ինչպիսիք են տարբեր տեսակի կատարակտները, գլաուկոման, խալազիոնը, պտերիգիումը եւ այլն: Երեք տարվա ընթացքում Ախալքալաքի հիվանդանոցում իրականացվել է մոտ 100 վիրահատություն:

Վիրահատությունները թոշակառուների համար անվճար են՝ 70%-ը վճարում է պետությունը, 30%-ը՝ մունիցիպալիտետը, իսկ մնացած քաղաքացիները վճարում են ընդհանուր արժեքի 30%-ը: