Սամցխե-Ջավախեթիի պետական համալսարանի Ախալքալաքի III մասնաշենքում պետության կողմից ֆինանսավորվող մասնագիտական կրթության ծրագրի շրջանակներում կավելացվի 5 ծրագիր:
Սամցխե-Ջավախեթիի պետական համալսարանի Ախալքալաքի մասնաշենքում 2020 թվականից գործում է «Մաքսային գործ» մասնագիտական ծրագիրը, այս տարի, սեպտեմբերին կավելացվի 5 նոր ծրագիր. Անտառտնտեսություն, այգեպան, էլեկտրաէներգիա, հաշվապահություն, Համակարգչային ցանց և համակարգեր:
Ծրագիրը հասանելի է ինչպես լիարժեք միջնակարգ, այնպես էլ բազային (9-րդ դասարան) կրթություն ունեցողների դիմորդների համար: Բազային կրթություն ունեցող դիմորդը կարող է մասնագիտությանը զուգահեռ սովորել դպրոցական ծրագրի պարտադիր առարկաները, համապատասխանաբար ստացված դիպլոմը կփոխարինի ատեստատին: Միջնակարգ կրթության հավաստագրին համարժեք դիպլոմ ունեցող դիմորդը կարող է ուսումը շարունակել ցանկացած բուհում:
«Ծրագիրը կիրագործվի համալսարանի շրջանակներում, այն հաշվի կառնի նաև հայալեզու ուսանողների ընդունելությունը, մենք ունենք նրանց համար վրացերենի պատրաստման համար առանձնացված 30 կրեդիտային մոդուլ: Երկու գործող ծրագիր Ախալցիխեում ունենք, մեկը՝ Ախալքալաքում: Մինչև սեպտեմբեր 5 ծրագիր կանցնի լիցենզավորման կարգ, այնուհետև կլինեն Քննությունների կենտրոնի կողմից կազմակերպված ընդունելության քննություններ և սեպտեմբերից Ախալքալաքում նոր ծրագրերը արդեն կսկսեն գործել»,- JNEWS-ի հետ զրույցում ասաց Սամցխե-Ջավախեթիի պետական համալսարանի որակի ապահովման ծառայության ղեկավար Ցիսկարա Զարանդիան:
Ուսուցիչների ընդունելության համար հայտերի ընդունման գործընթացը ավարտվել է փետրվարին: Հայտարարված է մրցույթ, ինչպես նշեց Ցիսկարա Զարանդիան, մրցույթը կանցկացվի այս շաբաթ:
