Թբիլիսիի ինֆեկցիոն հիվանդանոցի ղեկավար Թենգիզ Ցերցվաձեն հայտնել է, որ կորոնավիրուսի դեմ պատվաստանյութ մատակարարելու առումով բանակցությունները վարվում են մի քանի ուղղություններով, մասնավորապես արտադրող ընկերությունների հետ:
Ըստ Ցերցվաձեի, Վրաստանը մինչեւ փետրվարի վերջ կստանա «Pfizer»-ի մինչեւ 30 000 դեղաչափ, որոնք կօգտագործվեն բուժաշխատողների պատվաստման համար: «Բացի այդ, մենք ակնկալում ենք «AstraZeneca» պատվաստանյութի շուրջ 200 000-ից ավելի դեղաչափի «COVAX» պլատֆորմից, որը նախատեսված է ռիսկային խմբերի և բուժաշխատողների համար», – պարզաբանել է Ցերցվաձեն:
«Ես տիրապետում եմ ոչ պաշտոնական կամ կիսապաշտոնական տեղեկատվության, բացի այդ, մեր կառավարությունը և համապատասխան մարմինները, Հիվանդությունների վերահսկման կենտրոնը և Առողջապահության նախարարությունը՝ անձնական բանակցություններից հետո, պայմանավորվել են, որ հիմա` փետրվար-մարտ ամիսներին, Վրաստան կներմուծվի ևս 150 000 դեղաչափ: Սա արդեն լուրջ է, շատ լավ է առաջին քայլի համար:
Մենք կկարողանանք պատվաստել ամենաբարձր ռիսկային խմբերին: Հաշվի առնելով այն, որ առանց պատվաստանյութի էլ մեզ հաջողվել է բարելավել համաճարակային իրավիճակը, այն մեզ կօգնի այս գործընթացում: Մենք գտնում ենք, որ Վրաստանի համար ամենավատ ժամանակաշրջանն ետևում է:
Ես անվանել եմ երաշխավորված պատվաստանյութերը, բայց պատվաստանյութերի հավանական քանակի մատակարարումը շատ ավելի մեծ է, բանակցություններ են տարվում մի քանի ուղղություններով», – Վրաստանի Առաջին ալիքին հայտնել է Թենգիզ Ցերցվաձեն:
