Մինչև փետրվարի 1-ը COVID-սահմանափակումների խոստացված մեղմացումը չի լինի: Այս մասին այսօր հայտարարել է Էկոնոմիկայի եւ կայուն զարգացման նախարար Նաթիա Թուրնավան: Ըստ նրա, այսօրվա դրությամբ կա երրորդ ալիքի վտանգ, ուստի ձեռնարկված միջոցառումների մեղմացումը կլինի չկշռադատված որոշում:
«Հաշվի առնելով, որ կա երրորդ ալիքի վտանգ, ինչպես մենք դա տեսնում ենք Եվրոպայում, մենք կմնանք գործող ռեժիմի սահմաններում մինչև փետրվարի 1-ը, ինչը նշանակում է, որ նախկինում բոլոր սահմանափակված ակտիվությունները կգործեն նախկին ռեժիմով», — հայտարարել է Թուրնավան:
Հիշեցնենք, որ նոյեմբերի 28-ին իշխանությունները խստացրել էին սահմանափակումները, միևնույն ժամանակ խոստացել էին 2021 թվականի հունվարի 16-ից աստիճանաբար վերադառնալ բնականոն կյանքի ռիթմին: Այսօրվա դրությամբ Վրաստանում պարետային ժամ է գործում, որը արգելում է ժամը 21:00-ից 05:00-ը տեղաշարժը, չի գործում հասարակական տրանսպորտը, փակ են առևտրի կետերը (բացառությամբ մթերային խանութներից և դեղատներից), մարզադահլիճները, լողավազանները և ֆիթնես-կենտրոնները: Ռեստորանների, սրճարանների, բարերի, գիշերային ակումբների աշխատանքն արգելված է: Սահմանափակված է նաև լեռնադահուկային հանգստավայրերի աշխատանքը:
