«Լրագրողական էթիկայի խարտիայի» ներկայացուցիչները և անկախ ԶԼՄ-ների լրագրողներն երեկ ցույց են անցկացրել Թբիլիսիում՝ ՆԳՆ շենքի դիմաց: Նրանք այնտեղ էին գնացել «Մի՛ կուրացրեք մեզ» կարգախոսով:
Ցուցարարներն իրենց հետ բերել էին վիրավորված լրագրողների լուսանկարներ, այդ թվում` «Պիրվելի» հեռուստաընկերության օպերատորի, որի աչքը վնասվել էր նոյեմբերի 8-ին ԿԸՀ շենքի մոտ տեղի ունեցած բողոքի ցույցի ժամանակ ջրցանի հարվածից, և նրան ստիպված էին եղել շտապ վիրահատել:
Այսկերպ ցուցարարներն իրենց աջակցությունն էին հայտնում նոյեմբերի 8-ին Կենտրոնական ընտրական հանձնաժողովի շենքի դիմաց ցույցի ժամանակ տուժած լրագրողներին:
Հաղորդվում է նաև վնասված տեխնիկայի մասին: «Պիրվելի» հեռուստաընկերության գլխավոր պրոդյուսեր Նոդար Մելաձեն ֆեյսբուքում գրել էր, որ ԿԸՀ-ի մոտակայքում տեղի ունեցած ցույցի ընթացքում վնասվել են հեռուստաալիքի վեց տեսախցիկներ:
Ցուցարարները Վրաստանում հավատարմագրված դիվանագիտական կորպուսին և միջազգային կազմակերպություններին կոչ են անում ուշադրություն դարձնել նոյեմբերի 8-ին ցույցը ցրելու ընթացքում չորս լրագրողների վիրավորվելու փաստին: Նրանք նաև ուշադրություն են հրավիրում այն փաստի վրա, որ ՆԳՆ-ն դեռ չի ուսումնասիրել 2019 թ. հունիսի 20-ին խորհրդարանի առջև անցկացվող ցույցերի ընթացքում շուրջ 40 լրագրողների վիրավորվելու փաստերը:
«2020 թվականի նոյեմբերի 8-ին Կենտրոնական ընտրական հանձնաժողովի դիմաց հանրահավաքի ընթացքում իրավապահ մարմինների կողմից անհամաչափ ուժի կիրառման արդյունքում վիրավորվել է չորս լրագրող: Վնասվածքներ են ստացել նաև այլ լրագրողներ, վնասվել են նրանց սարքավորումները: Ցույցը ցրելու ժամանակ, ԶԼՄ-ների ներկայացուցիչների դեմ նպատակային կերպով օգտագործվել են ջրցան մեքենաներ:
Վրաստանի լրագրողական էթիկայի խարտիան միշտ փորձել է չանտեսել հետապնդումների և լրագրողների գործունեությանը ապօրինի միջամտության յուրաքանչյուր փաստ և միշտ դիմել է հետաքննչական մարմիններին, բայց այս բոլոր փորձերը մնացել են անպատասխան, ինչպես և 2019 թ. հունիսի 20-ի ցույցերի ցրումը: Այս մոտեցումը էլ ավելի է նպաստում բռնությանը:
Վրաստանի լրագրողական էթիկայի խարտիան Վրաստանում հավատարմագրված դիվանագիտական կորպուսի և միջազգային կազմակերպությունների, ինչպես նաև միջազգային լրագրողական ասոցիացիաների ներկայացուցիչներին կոչ է անում օգտագործել բոլոր հնարավոր միջոցները Վրաստանում խոսքի և արտահայտման ազատությունը պաշտպանելու և լրագրողների համար աշխատանքային անվտանգ պայմաններ ստեղծելու համար», – ասվում է Խարտիայի տարածած ուղերձում:
Լրագրողական էթիկայի խարտիայի գործադիր տնօրեն Մարիամ Գոգոսաշվիլին հաղորդել է, որ նոյեմբերի 8-ի հանրահավաքում լրագրողներին վիրավորելուց բացի եղել են նաեւ լրագրողական գործունեությանը խոչընդոտելու դեպքեր: Ըստ նրա, Կանոնադրությունը գրանցում և ուսումնասիրում է յուրաքանչյուր նման փաստ:
«Դուք գիտեք, որ հունիսի 20-ին վիրավորվել է շուրջ 40 լրագրող, բայց, ըստ մեր տեղեկությունների, շատ դեպքերում հետաքննությունը դեռ ավարտին չի հասցվել: Կարծում ենք, որ նման անպատժելիությունը խրախուսում է հետագա խախտումներին, քանի որ երեկ մենք ականատես եղանք լրագրողներին վնաս հասցնելու և նրանց գործունեությանը ապօրինի խոչընդոտելու փաստերին:
Կարծում ենք, որ նման դեպքերը պետք է հետաքննվեն ժամանակին և արդյունավետ: Մենք նաև կոչ ենք անում միջազգային հանրությանը օգտագործել բոլոր հնարավոր միջոցները` Վրաստանում խոսքի ազատությունն ու լրագրողների համար աշխատանքային նորմալ պայմաններն առավելագույնս ապահովելու համար:
Նորմալ չէ, երբ տեսնում ենք, որ լրագրողների ուղղությամբ, ովքեր եկել էին հանրահավաքին, կրակում են փամփուշտներով ու ջրցան մեքենաներից», – ասել է Մարիամ Գոգոսաշվիլին:
«Մի՛ կուրացրեք մեզ» ակցիային միացել էին նաև Բաթումիում: Այնտեղ լրագրողները պաստառներով ուղղվել էին դեպի Եվրոպայի հրապարակ:
Աղբյուրը՝ «Новости Грузия»
