Ամռան գալու հետ մեկտեղ օձերի խայթոցները ավելի հաճախակի են դառնում Ջավախքում: Ախալքալաքի հիվանդանոցի համաճարակաբան Գայանե Իսպիրյանը խորհուրդ է տալիս լինել զգույշ, պատրաստված և օձի խայթոցի դեպքում ցուցաբերել գրագետ և ճիշտ առաջի բուժօգնություն:

Ջավախքում օձերի ակտիվությունը սկսվում է մայիսի վերջից մինչև հոկտեմբեր: Ջավախքում շատ հազվադեպ կարելի է հանդիպել թունավոր օձերի, բայց շոգ եղանակին ոչ թունավոր օձեր այստեղ հաճախ կարելի է տեսնել, հատկապես գյուղական վայրերում, դաշտերում, արոտավայրերում: Օձեր հանդիպում են նաև քաղաքում, բակերում և այգիներում:

Ախալքալաքի շրջանային հիվանդանոցում JNEWS- ին մեկնաբանեցին, որ 2020 թվականին Ախալքալաքի մունիցիպալիտետում օձի խայթոցի դեպքեր չեն գրանցվել: Հիվանդանոցից հավաստիացրեցին, որ խայթոցի դեպքում նրանք ունեն համակցված շիճուկ օձի թույնի դեմ:

«Եթե օձը խայթում է, մարդիկ անպայման դիմում են հիվանդանոց, այլ դեպքերում գուցե չդիմեն, բայց եթե օձն է կծել, անպայման դիմում են մեզ, նրանք շատ են վախենում դրանից: Բայց մենք, բարեբախտաբար, այս տարի ոչ մի օձի խայթոց չենք արձանագրել », – ասում է Գայանե Իսպիրյանը:

Բժիշկը խորհուրդ է տալիս զգույշ լինել և օձ տեսնելիս չվազել, չգոռալ և չշրջվել:

«Օձը դառնում է ագրեսիվ, եթե զգում է շարժում, այնպես որ, երբ հանդիպում եք օձի, պետք է կանգ առնել կամ դանդաղ ետ գնալ», – ասում է նա:

Մարդու մարմնի վրա օձի խայթոցի նշանները նկատվում են երկու առանձին, մի ուղղությամբ կետերի, վերքերի տեսքով, որոնցից արյուն է հոսում:

Խայթոցի ժամանակ մարդը ուժեղ ցավեր է ունենում: Ըստ բժշկի, խայթոցների 40% -ի դեպքում բուժման արդյունավետությունը կախված է ճիշտ կատարված առաջին բուժօգնությունից:

Օձից տուժվածին պետք է անշարժացնել և սկսել բերանով վերքից հեռացնել արյունը, շատ հեղուկ տալ և հնարավորինս շուտ տեղափոխել հիվանդանոց:

«Մենք օձի բոլոր խայթոցները՝ թունավոր և ոչ թունավոր, համարում ենք որպես թունավոր, քանի որ դրանք պոտենցիալ վտանգ են ներկայացնում: Առաջին 30 րոպեի ընթացքում պետք է հնարավորինս շուտ առաջին օգնություն ցուցաբերել և արագ հեռացնել արյունը վերքից », – ասում է Գայանե Իսպիրյանը:

Բժիշկը խորհուրդ է տալիս, վտանգավոր վայր ճանապարհորդելիս պատրաստված լինել, վերցնել սովորական հոգնայի տանձիկ, որը կօգնի հանել արյունը վերքից:

«Պետք է դնել վերքին և սեղմել ու դանդաղորեն բաց թողնել, տանձիկը լցվում է արյունով և այդպես կրկնել», – խորհուրդ է տալիս բժիշկը: