Հուլիսի 21-ի՝ ժամը 22:30-ին, «Անվախ» դիրքի ուղղությամբ Ադրբեջանի հատուկ նշանակության ստորաբաժանումը ձեռնարկել է հերթական հարձակումը: Հայկական ԶՈւ ստորաբաժանումը հետ է մղել հակառակորդի գրոհը` պատճառելով զգալի կորուստներ, հայտնում է ՊՆ խոսնակ Շուշան Ստեփանյանը։
Ըստ նախնական տվյալների` հակառակորդի հատուկ նշանակայինները բացի կորուստներից ունեն նաև ծուղակում մնացած զինծառայողներ:
Հայկական կողմը կորուստներ չունի:
Հուլիսի լույս 16-ի գիշերն Ադրբեջանի հատուկ նշանակության ջոկատները մոտ 100 հոգով դիվերսիոն հարձակումն էին իրականացրել՝ սահմանապահ «Անվախ» դիրքը գրավելու նպատակով։ Այն գտնվում է Տավուշի մարզի Մովսես և Այգեպար գյուղերի ուղղությամբ: ՀՀ զինված ուժերը շրջանաձև պաշտպանությամբ կանխել էին հակառակորդի դիվերսիոն փորձը, թեժ մարտից հետո հակառակորդը հետ էր շպրտվել՝ տալով զոհեր և վիրավորներ, կորցնելով տեխնիկա։ Հայկական կողմը զոհեր ու վիրավորներ չէր ունեցել ոչ զինվորականների, ոչ խաղաղ բնակչության շրջանում։
