Այսօր, մայիսի 26-ին, Վրաստանը նշում է ամենագլխավոր ազգային տոնը` Անկախության օրը: Կորոնավիրուսի համաճարակի հետ կապված, բոլոր զանգվածային միջոցառումները, որոնք ավանդաբար անցկացվում էր այս օրը, չեղյալ են հայտարարվել:
Ազգային խորհրդի որոշմամբ, 1918 թվականի մայիսի 26-ին, Վրաստանը հռչակվել է անկախ հանրապետություն: Հանրապետության նախագահ է ընտրվել Նոե Ժորդանիան: 1918 թվականի մայիսի 26-ին ընդունել են «Վրաստանի պետական անկախության արձանագրությունը»: Վրաստանի Ժողովրդավարական Հանրապետությունը, որի անկախությունը ճանաչել էին Եվրոպայի առաջատար երկրները, դադարել է գոյություն ունենալ Խորհրդային Ռուսաստանի կողմից իրականացված բռնազավթումից հետո:
Վրաստանին հաջողվել է անկախությունը վերականգնել 70 տարի անց, 1991 թվականի ապրիլի 9-ին:
Կորոնավիրուսի համավարակից ելնելով, այս տարի Վրաստանի անկախության օրվան նվիրված մասշտաբային միջոցառումներ չեն անցկացվի, սակայն մայիսի 26-ը տոնական միջոցառմամբ կնշվի պաշտպանության ուժերի բոլոր հետևակային բրիգադներում:
Գլխավոր միջոցառումն անցկացվելու է Վազիանիի 4-րդ մեխանիզացված բրիգադի հրապարակում:
Պաշտոնական միջոցառման մեկնարկից առաջ Վրաստանի իշխանության ներկայացուցիչները հարգելու են Վրաստանի անկախության և տարածքային ամբողջականության համար պայքարում զոհված հերոսների հիշատակը և ծաղիկներ խոնարհելու տարածքում դրված հուշարձանին:
Խոսքով ելույթ են ունենալու Վրաստանի նախագահը, վարչապետը, խորհրդարանի նախագահը և պաշտպանության նախարարը: Այնուհետև, ելույթներից հետո կայանալու է զինծառայողների պարգևատրման արարողությունը:
Տոնական միջոցառման պաշտոնական մասի ավարտից հետո կցուցադրվի ռազմական տեխնիկան:
Չնայած այս տարվա տոնի համեստ մասշտաբներին, Վրաստանն իր Անկախության օրը նշում է հաջողություններով՝ կորոնավիրուսի պանդեմիայի դեմ պայքարում: Ըստ միջազգային փորձագետների, երկիրը կարողացել է դրան հասնել շնորհիվ ժամանակին ձեռնարկված կոշտ միջոցների:
