Վրաստանի ՆԳՆ աշխատակիցները ձերբակալել են վեց հոգու՝ «գողական աշխարհին» անդամակցելու և դիմելու համար։ Այս մասին այսօրվա ճեպազրույցում հայտարարել է ՆԳՆ Կենտրոնական քրեական ոստիկանության բաժանմունքի տնօրեն Մամուկա Ճելիձեն:
Քննչական և գործառնական միջոցառումներ են իրականացվել Վրաստանի դատախազության հետ միասին՝ Թբիլիսիում, Քութաիսիում, Բաթումում և Քոբուլեթիում:
Ձերբակալվել են 56-ամյա Մ.Մ.-ն, 39-ամյա Ս.Բ.-ն, 43-ամյա Զ.Բ.-ն, 50-ամյա Դ.Մ.-ն, 43-ամյա Ց.Շ.-ն և 30-ամյա Բ.Չ.-ն: Բոլոր մեղադրյալները ձերբակալվել են իրենց տներում:
Հետաքննությամբ պարզվել է, որ նրանց միջև ֆինանսական վեճը լուծելու համար ձերբակալվածները դիմել են «գողական աշխարհի» անդամներին և «օրենքով գող» Նիկոլոզ Փուրցխվանիձեին՝ «Բուրդգունիչա» մականունով, որը գտնվում է արտերկրում:
«Գողական աշխարհի» անդամների միջև, ովքեր եղել են դատավարության մասնակիցներ, տեղի է ունեցել այսպես կոչված «հաշիվ մաքրելու» հավաք, որից հետո մի կողմին պարտավորեցրել են մեկ ամսվա ընթացքում վճարել 8,7 հազար եվրո գումար:
«Գողական աշխարհի» անդամների կողմից պարբերաբար ճնշումների պատճառով Ն.Շ.-ն և Դ.Մ.-ն ստիպված են եղել այդ գումարը փոխանցել արդեն այս հանցագործության համար մեղադրյալ անձանց:
Խուզարկության արդյունքում ոստիկանությունը որպես ապացույց առգրավել է համակարգչային տեխնիկա և բջջային հեռախոսներ, որոնց օգնությամբ նրանք կապվել են «օրենքով գող» «Բուրդգունիչայի» հետ:
Հետաքննությունն իրականացվում է Վրաստանի Քրեական օրենսգրքի հոդվածի համաձայն՝ ապօրինի կազմավորման ստեղծում կամ դրա ղեկավարում, կամ էլ մասնակցություն այնպիսի կազմավորման կամ դրա ֆինանսավորման մեջ: Մեղադրյալներին սպառնում է երեքից տաս տարվա ազատազրկում:
