Ախալքալաքի շրջանի Դադեշ գյուղի բնակիչները կրկին բողոքում են, որ Բաքու-Թբիլիսի-Կարս երկաթուղին փակել է անասունների ճանապարհը: Երկաթուղին գյուղը բաժանում է արոտավայրերից, բնակիչների համար նախատեսված ճանապարհը նույնպես չի օգտագործվում:
Բաքու-Թբիլիսի-Կարս երկաթուղին անցկացվել է գյուղի և դադեշցիների կողմից օգտագործվող հարթավայրային արոտավայրերի միջև, և քանի որ շինարարության ընթացքում ճանապարհը զգալիորեն բարձրացվել է, անասունները չեն կարող անցնել այդտեղով:
Ընկերության մամուլի ծառայության տեղեկատվությամբ՝ «Մարաբդա-Կարծախ» ՍՊԸ-ն պետք է հատուկ վայրեր ստեղծեր նախիրների համար, ինչը և արել են:
«Ծրագրով նախատեսված անասուններին քշելու 7 ճանապարհները կառուցվել են նշված գյուղերում»:
Գյուղացիների խոսքով՝ Դադեշ-Սուլդա հատվածում կառուցվել է անասուններին քշելու մի ճանապարհ, սակայն տեղն ընտրվել է ոչ հարմար, ոչ առաջին, ոչ երկրորդ գյուղի բնակիչները դրանից չեն օգտվում: Բացի այդ, Դադեշի բնակիչներն ասում են, որ անասունների համար կառուցվող ճանապարհներն արդեն շարքից դուրս են եկել:
Ըստ Դադեշ գյուղի բնակիչների, մի քանի անգամ անասուններին քշելու համար հատուկ վայրեր չլինելու պատճառով, կովերը վերջույթների կոտրվածքներ են ստացել: Ըստ գյուղացիների պնդման՝ անցման ընթացքում նույնիսկ բնակիչներից մեկն է կոտրել իր ոտքը:
Ըստ Դադեշի լիազոր Էդգար Թումասյանի, դեռ գյուղերում անասուններին քշելու ճանապարհներ չեն կառուցվել:
«Մենք այս հարցով մի քանի անգամ դիմել ենք պատկան մարմիններին, բայց ապարդյուն», – ասում է Էդգար Թումասյանը:
Ինչպես վստահեցնում են գյուղացիները՝ նրանց խոստացել են լուծել այս խնդիրը, բայց չեն կատարել իրենց խոստումը:
Ինչ վերաբերում է շինարարական ընկերության կողմից տրամադրված մեքենաների համար նախատեսված ճանապարհին, ապա այն կառուցվել է երկաթուղային գծի տակ՝ գյուղի ներկայիս ճանապարհից մոտ 200 մ հեռավորության վրա:
Գյուղի բնակիչը բողոքում է, որ շինարարները գյուղացիների հետ չեն խորհրդակցել նոր ճանապարհի գտնվելու վայրի մասին և կառուցել են շատ անհարմար տեղում:
«Ինչու են այն կառուցել շատ հեռու, այնտեղ ամենուրեք ճահճացած վիճակ է, այնտեղ կառուցելը նրանց համար պարզապես հարմար էր, ահա և կառուցեցին այնպես, որ ավելի քիչ ծախսեր լիներ: Մենք բողոքել ենք, բայց ոչ ոք ուշադրություն չդարձրեց և չարձագանքեց», – ասում է Դադեշ գյուղի բնակիչը:
Ըստ գյուղացիների պնդման, խնդիրը կայանում է նրանում, որ նույնիսկ եթե մարդիկ սկսեն օգտվել բնակիչների անցման համար նախատեսված նոր ճանապարհից, երբ գնացքները ավելի հաճախ սկսեն երթևեկել, ձմռանը այդ ճանապարհը չի կարողանա շահագործվել:
«Ձմռանը մենք լիովին փակուղու մեջ կհայտնվենք: Ճանապարհը փոսի մեջ է գտնվում, երկու կողմից բլուրներ են: Նրանք խոստացան, որ երկաթուղին աշխատելուն պես կկառուցվի նոր ճանապարհ», – ասում է Էդգար Թումասյանը:
Գյուղացիների խոսքով՝ սա գյուղի բազմաթիվ խնդիրներից մեկն է:
«Մենք շատ խնդիրներ ունենք, մենք պարզապես խնդրում ենք, որ դրանցից գոնե մեկը լուծվի», – ասում է գյուղի բնակիչը:
Հիշեցնենք, որ ավելի վաղ շինարարական ընկերության մամուլի ծառայությունն ասում էր, որ «նման խնդիրների հետ կապված բնակչությունը պետք է դիմի տեղական ինքնակառավարման գերատեսչություններին, որոնց հետ ակտիվ հաղորդակցություն է վարում ՍՊԸ «Մարաբդա-Կարծախ երկաթուղի»-ն:
Ըստ փոխքաղաքապետ Արմեն Մառանգոզյանի՝ իրենք տեղյակ են Դադեշ գյուղի խնդրի մասին և կանեն ամեն ինչ՝ բնակիչներին օգնելու համար: Վերջինիս պնդմամբ, իրենք պետք է նախագիծը խնդրեն «Մարաբդա-Կարծախ» երկաթուղային ընկերությունից, որպեսզի տեսնեն` արդյոք ամեն ինչ համապատասխանում է նախագծին:
«Եթե ամեն ինչ արված է նախագծի համաձայն, ապա մենք չենք կարող որևէ բան փոխել», – ասում է Արմեն Մառանգոզյանը:
Ըստ նրա, նրանք կբարձրացնեն այս հարցը, բայց չեն խոստանում, որ կլուծեն, քանի որ այդ հարցի լուծումը իրենց իրավասության մեջ չէ:
Բրատիսլավ Իգիթխանյան
