Ախալքալաքում այս տարի փոսային նորոգման տենդեր դեռ չի հայտարարված: Քաղաքապետարանը եւ կատարողը ոչ մի կերպ համաձայնության չեն գալիս անցյալ տարվա վերանորոգման հարցի շուրջ:
Ախալքալաքում փոսերով երթևեկելը վարորդների համար իսկական փորձություն է: Նրանք դժգոհ են փողոցների դժվարանցանելիությունից եւ այն փաստից, որ ստիպված են ամեն օր մեքենաները վերանորոգել: Նրանք ասում են, որ քաղաքում փոսային նորոգումը որակով չի կատարվում, եւ դրանից հին փոսերն ավելի են խորանում եւ մեծանում:
Անցյալ տարի Ախալքալքում փոսային աշխատանքների համար հայտարարվել էր երկու տենդեր, եւ երկու անգամն էլ հաղթել էր «Ջավախ Ավտո Գզա» ընկերությունը: Ընկերությունն ամբողջ գումարը լրիվությամբ չի ստացել:
Քաղաքապետարանի ֆինանսական ծառայության պետ Մկրտիչ Մղդեսյանն ասում է, որ գումարը չի փոխանցել, քանի որ չի տեսել կատարված աշխատանքների արդյունքները:
«Նրանք մեզ պարտք են 1384 ք / մ ասֆալտ: Մինչեւ նրանք չավարտեն՝ գումարը չեն ստանա », – ասում է Մկրտիչ Մղդեսյանը:
«Ջավախ Ավտո Գզա» ՍՊԸ-ի տնօրեն՝ Նոդար Ինասարիձեն այս տեղեկատվությունը հերքում է եւ ասում է, որ հակառակը, նրանք նախատեսվածից ավելին են կատարել:
«Նրանք մեր դեմ են տրամադրված, չգիտեմ ինչու: Հունիսին (խմբ. 2018 թ.)կատարած աշխատանքի համար, նրանք մեզ վճարեցին միայն այս տարվա փետրվարին: Եղանակային պայմանները խիստ են եւ ձմեռվանից հետո վերականգնողական աշխատանքները դեռ նոր են սկսվում: Ես հո մեղավոր չեմ, որ մինչեւ ձմեռը չգա, նրանք չեն ասում, թե որ փողոցներում անցկացնենք փոսային աշխատանքներ: Դա նրանց մեղքն է, որ դեկտեմբերին են ասում, թե որտեղ եւ ինչ պետք է անել », – ասում է Նոդար Ինասարիձեն:
Սակրեբուլոյի բյուջետա-ֆինանսական կոմիտեի նիստի ժամանակ, ենթակառուցվածքային աշխատանքները քննարկելիս, պատգամավորները քաղաքապետարանից պահանջեցին բացատրություն, թե ինչու մինչև հիմա մրցույթ չի հայտարարվել փոսային նորոգումների համար, քանի որ արդեն մեկ ամիս է, ինչ Սակրեբուլոն հաստատել է այդ աշխատանքների համար 200 000 լարի:
Ախալքալաքի քաղաքապետարանի ենթակառուցվածքների, տարածքային կառավարման, ճարտարապետության եւ շինարարության վարչության պետ Ալբերտ Նահատակյանն ասաց, որ արդեն կատարվել է վնասված մասերի հայտնաբերումը և շուտով տենդեր կհայտարարեն:
Շուշան Շիրինյան
