Մանկապարտեզների միավորման գլխավոր հաշվապահ Աստղիկ Տաշչյանը պաշտոնանկ արվեց անցած տարվա կեսերին, նա համարում է, որ աշխատանքից նրան ազատել են ոչ թե իր արած խախտումների պատճառով, այլ այն, որ նա տեսել և նշել է տնօրինության կողմից իրականացված խախտումները: Միավորման տնօրենը չի մեկնաբանում հաշվապահի մեղադրանքները, սակայն ասում է, որ աշխատանքից հեռացումը չի հակասում օրենքին: Քաղաքապետարանում քննարկում են Միավորման կատարած աշխատանքի մասին ընդհանուր զեկույցը:

Մանկապարտեզների միավորումը ստեղծվել է 2016 թ. հունիսին՝ Ախալքալաքի մունիցիպալիտետի ենթակայության տակ, որպես առանձին իրավաբանական անձ: Մինչ այդ յուրաքանչյուր մանկապարտեզ իր սեփական տնօրենն ու հաշվապահն ուներ, արդյունքում մնաց ընդամենը մեկ տնօրեն և մեկ հաշվապահ: Մնացած հաշվապահները աշխատանքից հեռացվեցին, իսկ մանկապարտեզների տնօրենները դարձան կառավարիչներ: Միավորման նախագահ է նշանակվել Զառա Բարբարյանը, իսկ հաշվապահ` Աստղիկ Տաշչյանը:

2018 թ. ամռանը Աստղիկ Տաշչյանը հեռացվել էր աշխատանքից այն պատճառով, որ գնացել էր արձակուրդի: Ինքը կարծում է, որ աշխատանքից ազատել են, որպեսզի նա չնկատեր և չնշեր խախտումները: Աստղիկը պաշտոնանկությունը բողոքարկել է Ախալքալաքի Շրջանային դատարանում: Դատավարությունը տևել էր 2018 թ. նոյեմբերից մինչև 2019 թ. փետրվարի վերջ: Արդյունքում, դատարանը չէր բավարարել Աստղիկ Տաշչյանի հայցը, սակայն նա պատրաստվում է բողոքարկել դատական որոշումը վերաքննիչ դատարանում:

«Եղավ 10-15 դատավարություն, և գործը քննարկվեց որպես վարչական: Աշխատանքից ազատել կարելի է, եթե խախտումը լուրջ է, մյուս դեպքերում` նախազգուշացում գոյություն ունի, կարող են գանձել ձեր աշխատավարձից որոշակի տոկոս և այլ տարբեր միջոցներ: Աշխատանքից ազատելը վերջին քայլն է, երբ այլ ելք չկա: Արդեն բոլոր դատական նիստերից հետո, երբ բոլոր վկաներն արդեն հարցաքննվել էին, նրանց փաստաբանը միջնորդեց, որ սա վարչական գործ չէ, այլ քաղաքացիական: 5 ամիս վարչական էր և հանկարծ փոխեցին քաղաքացիականի: Երբ նրանք չկարողացան ապացուցել էթիկական նորմերի խախտումը, վերջում մտածեցին տիկին Աստղիկը 5 օր աշխատանքից բացակայել է, նախքան նա գրել էր դիմում օգոստոս ամսին և արձակուրդ խնդրել: Եթե գործը լիներ վարչական՝ 5 օրվա համար չէին կարողանա ազատել: Ինձ մոտ տպավորություն ստեղծվեց, որ դատավորը հատուկ փոխեց դատական գործը քաղաքացիականի, որպեսզի նրանք այս 5 օրերը որպես հիմք վերցնեին, կոպիտ խախտում համարեց և չբավարարեց մեր հայցը: Նրանք գտնում են, որ արձակուրդի գնալը համաձայնեցված չի եղել տնօրինության հետ», – ասում է Աստղիկ Տաշչյանի փաստաբան Վասիլ Բալախաձեն:

Նա նաև նշում է, որ Աստղիկ Տաշչյանը դիմել է ֆինանսական ոստիկանություն և տրամադրել բոլոր փաստաթղթերը՝ Միավորման տնօրինության խախտման առնչությամբ, սակայն այնտեղից արդեն երկրորդ տարին է լուր չկա:

Ինքը՝ Աստղիկ Տաշչյանը պնդում է, որ Միավորման տնօրենը չարաշահում է իր պաշտոնը և, ըստ էության, Մանկապարտեզների միավորումը ղեկավարում է տնօրենի ամուսինը` Արթուր Բարբարյանը:

«Նախևառաջ 3000 լարի էր հատկացվել տրանսպորտային ծախսերի համար, իսկ որպես տաքսու վարորդ աշխատում էր տնօրենի ամուսինը: Նա նաև մանկապարտեզի մատակարարն էր, պայմանագրի հիման վրա, որը կնքվել էր դեռ մինչև Միավորման կազմավորումը, որը ստորագրվել էր Միավորվան ստեղծման նախօրեին: Եվ բնական էր, որ պայմանագիրը չէր կարելի խզել: Արդյունքում մենք 3,50 լարիանոց ջեմը գնում էինք 8 լարիով: Սկզբում ես չգիտեի իրական գները, երբ իմացա, ինձ մեղավոր զգացի: Ստացվում է, մենք գնում էինք ապրանքը բարձր գներով», – պատմում է Աստղիկը:

Նա պատմում է, որ տնօրենի հետ իր կոնֆլիկտը սկսվել էր դեռ 2017 թվականին, երբ տնօրենը նշել էր, որ հաշվապահը չի կատարել իր հանձնարարությունը:

«Նա ամուսնու հետ միասին գնացել է Լիլո և խաղալիքներ գնելու, քանի որ Միավորումը պետք է խաղալիքներ գներ, դրա համար գումար էր նախատեսված: Տենդերով չէր, նրանք վերցրել էին այնքան գումար, որպեսզի տենդեր չհայտարարեին, այլ պայմանագիր կնքեին, 5000 լարիից քիչ գումար էին սահմանել: Նա (Արթուր Բարբարյանը) գտել էր Մղդեսյան ազգանունով ձեռնարկատիրոջ, որը նրա հարեւանն էր:

Նա այդ Մղդեսյանից ստացել է լիազորագիր և կնոջ հետ պայմանագիր կնքել՝ այդ խաղալիքները ձեռք բերելու համար: Ես ասացի, որ մինչև մանկապարտեզներին խաղալիքները չհասնեն, ես ոչ մի փոխանցում չեմ կատարի: Այդ ժամանակ տնօրենն ինձ ասաց, որ ես փոխանցում կատարեմ, քանի որ նրանք խնդիրներ ունեն, որ նրանք վարկեր և տոկոսներ ունեն բանկերում: Եթե իմ սեփական փողն ունենայի, ես կցանկանայի օգնել, բայց ես չէի կարող գնալ իմ խղճի դեմ», – պատմեց Աստղիկ Տաշչյանը:

Նա նաև պատմեց, որ սա առաջին դեպքը չէր, 2016 թ.-ին տնօրենի հրահանգի համաձայն նա փոխանցեց գորգերի գնման համար գումարը, մտածելով, որ գորգերն արդեն ձեռք են բերվել: Սակայն մանկապարտեզները ընդունման և հանձնման ակտեր չեն ստորագրել, պնդելով, որ նրանք գորգեր չեն ստացել:

«Բանն այն է, որ որպես տնտեսավար էր ընդունվել աշխատանքի Արթուր Բարբարյանի զարմիկը: Փաստացիորեն նրա անունը կար, սակայն նա չէր աշխատում: Ամեն ինչ կատարվում էր կուլուարային մակարդակով, նա ստորագրում էր բոլոր փաստաթղթերը: Սակայն տնտեսվարը ստորագրել էր այն փաստաթղթերը, որոնցում գրված էր, որ նա ստացել է գորգերը: 2016 թվականին մենք Մղդեսյանի անունով 16 000 լարի փոխանցում էինք կատարել: Տնտեսվարը ստորագրել էր, որ նա ստացել է գորգերը, սակայն պարզվեց, որ չի ստացել: 5 ամիս անց գորգերը բերվեցին, բայց Աստված գիտի, թե ինչ գորգեր էին և ինչպես են դրանք բաշխվել», – պատմեց նա:

Աստղիկ Տաշչյանի խոսքերով, պաշտոնանկ լինելուց մեկ տարի առաջ նրան աշխատանքից հեռացնելու առաջին փորձն է եղել: Հենց այդ ժամանակ էլ՝ 2017 թվականի դեկտեմբերի 15-ին, նա դիմել է ֆինանսական ոստիկանությանը, ինչպես նաև քաղաքապետարանին, որտեղ ստեղծվել է հանձնաժողով, որը ստուգել է մանկապարտեզները: Այդ ժամանակ հաշվապահին աշխատանքից չեն հեռացրել:

Մանկապարտեզների միավորման տնօրենն ասում է, որ եթե հաշվապահի պաշտոնանկության ժամանակ նա խախտումներ ունենար, ապա դատարանը կբավարարեր նախկին հաշվապահի հայցը:

«Մանկապարտեզների միավորման գլխավոր հաշվապահ Աստղիկ Տաշչյանը զբաղեցրած պաշտոնից հեռացվել է Վրաստանի աշխատանքային օրենսդրության կոպիտ խախտման պատճառով, որը հաստատվել է Ախալքալաքի դատարանի որոշմամբ:

«Դատարանում իմ որոշումը ճշմարիտ են համարել: Դատարանը որոշումը իմ օգտին չէր կայացնի, եթե ապացույցները, որոնք նա ներկայացնում էր դատարանին, լինեին ապացուցող», – ասաց Զարուհի Բարբարյանը:

Մեր հարցերին՝ նախկին հաշվապահի կողմից իրեն ուղղված մեղադրանքների վերաբերյալ, նա զերծ մնաց մեկնաբանություններ անելուց:

Մանկապարտեզների միավորումը, որպես ուսումնական հաստատություն, անմիջականորեն ենթարկվում է Ախալքալաքի մունիցիպալիտետի քաղաքապետարանի Կրթության, մշակույթի, սպորտի և երիտասարդության հարցերի ծառայությանը: Այս ծառայության ղեկավար Վալերի Ստելմաշովը պարզաբանեց, որ ծառայությունը, որը գլխավորում է ինքը, զբաղվում է ընդհանուր գործընթացով, համակարգմամբ: Ծառայությունը իրավունք չունի հանդիմանություն անել կամ աշխատանքից հեռացնել:

«Ես կարող եմ ասել, որ բոլոր իրավաբանական անձանց շրջանում, վերջին տարիներին և ակտերը, և դիտողությունները մանկապարտեզների պատճառով էին: Բնականաբար, եթե աշխատում ես, ապա առանց սխալների չի լինում: Մանկապարտեզների աշխատանքում կան պահեր, որոնք անհասկանալի են, սակայն վեճի ժամանակ երկու կողմերին էլ լսում են: Ինչ վերաբերում է ամուսնուն, կարող եմ ասել, որ ամուսինը փաստացիորեն այդքան էլ չի ղեկավարում, այլ դա որոշակի մարդկանց հավաստիացումն է: Կարող եմ միայն ասել, որ վերջերս բոլորիս դուր չի գալիս Մանկապարտեզների միավորման աշխատանքը: Պարսավանքը շատ է: Մեկ խնդիրներ են լինում մթերքների հետ, մեկ տենդերի ձախողման, կամ միս չկա, կամ մեկ այլ բան, այս մասին մենք շատ ակտեր ունենք, ստուգում ենք, ուղարկում ենք զեկուցագրեր, քաղաքապետը հավաքում է այս ամենը և վերջում քաղաքապետն է որոշում կայացնում», – ասում է Վալերի Ստելմաշովը:

Ախալքալաքի մունիցիպալիտետի Սակրեբուլոյում նույնպես դժգոհ են Մանկապարտեզների միավորման աշխատանքից և Ախալքալաքի Սակրեբուլոյում նույնպես հիշեցին աուդիտի ծառայությանը, որն էլ պետք է զբաղվի կառույցների աշխատանքի ներքին հսկողությամբ:

«Քաղաքապետարանի հանձնաժողովին միացավ մեր հանձնաժողովը, իմ խնդրանքով ներգրավվեցին 2 պատգամավոր: Աստղիկ Տաշչյանի պաշտոնանկության հետ մանկապարտեզների թեման չի փակվում: Մի քանի օր առաջ կրկին հայտարարություն է եկել մանկապարտեզներից մեկի մենեջերի կողմից: Բողոք Միավորման տնօրենի, նրա ամուսնու դեմ, որ աշխատանքը վատ է կազմակերպվում: Շատ բաների շուրջ կան բողոքներ: Ինչ-որ կեղծ ընկերություն է բացվել, և նույնիսկ մեր հանձնաժողովին տրամադրել են Արթուր Բարբարյանի սեփական արտադրության սպասք լվացող միջոցներ: Բոլոր մանկապարտեզները մի ամիս չունեին մթերք: Ճաշացանկում կար միս, բայց մանկապարտեզները միս չէին ստանում: Ընդհանուր կարանտինը հունվարին էր, դա եղավ նրա բախտից: Նրա աշխատանքը պետք է լինի քաղաքապետարանի հսկողության տակ, ինչո՞ւ դա չի արվում: Քաղաքապետարանում նոր ծառայություն է բացվել` աուդիտ: Ում մասին խոսում են, որ այնտեղ իրենց բարեկամն է աշխատում: Փաստորեն, դա ապօրինի է, քանի որ բաեկամական կապեր կան: ազգականը, իսկ օրենքի համաձայն այդ հարցերով պետք է զբաղվի աուդիտը», – մեկնաբանում է Սակրեբուլոյի նախագահ Նաիրի Իրիցյանը:

Այս պահի դրությամբ Քաղաքապետարանում Ախալքալաքի քաղաքապետի կողմից պատրաստվում է մանկապարտեզների և Միավորման գործունեության առնչությամբ զեկուցագիր:

«Մենք գիտենք, որ շատ խնդիրներ կան, որոնք կուտակվել են մանկապարտեզներում: Այս առիթով բոլոր փաստաթղթերը պատրաստված են: Հիմա այն փուլն է, երբ մենք մտածում ենք, ինչպես վարվել, ինչ անել: Ես գիտեմ, որ աուդիտի ծառայությունը պարբերաբար ստուգումներ է անցկացնում, այլ բան չեմ կարող ասել», – ասում է փոխքաղաքապետ Արմեն Մառանգոզյանը:

Քրիստինե Մարաբյան