Այսօր, մարտի 3-ին Նինոծմինդայում անցկացվեց դահուկավազքի մրցաշար նվիրված դահուկային սպորտի վարպետ Թադևոս Արզումանյանի հիշատակին: Մրցաշարն արդեն երրորդ տարին է անընդմեջ անցկացվում է Նինոծմինդայում:

Նինոծմինդայի շրջանային դահուկավազքի մրցույթին մասնակցում էին գրեթե 80 դահուկորդ՝ Նինոծմինդայից, Բակուրիանից և հարևան Հայաստանից:

ninocminda dahuk

Նինոծմինդայի շրջանի Մշակույթի և սպորտի բաժնի ղեկավար Ժորա Սնխչյանը մրցաշարի բացմանն իր խոսքում շնորհակալություն հայտնեց բոլոր մասնակիցներին ու ներկաներին, և հույս հայտնեց.

«Տարեցտարի այս մրցույթն ավելի գեղեցիկ, ավելի մարդաշատ է դառնում, մասնակիցների քանակն ու աշխարհագրությունն է ավելանում: Հաջողություն եմ մաղթում բոլորին և ցանկանում եմ որ այս խաղերը նոր ստիմուլ հանդիսանան, թող սպորտային բախտը ժպտա և արժանանաք գավաթների»,- ասաց Ժորա Սնխչյանը:

ninocminda1

Իսկ դահուկավազքի մրցաշարի կազմակերպիչ, Նինոծմինդայի Սպորտ դպրոցի տնօրեն Անդրանիկ Ղարսլյանը վստահեցրեց, որ այս մրցումները շարունակական բնույթ կկրեն:

«Այս հուշամրցաշարն ուղղված է Նինոծմինդայում սպորտային կյանքի աշխուժացմանը, ինչպես նաև դահուկավազքի զարգացմանը»,- ասաց Անդրանիկ Ղարսլյանը:

Մրցույթի ավարտին մասնակիցներն ու լավագույն դահուկավազորդները պարգևատրվեցին մեդալներով, պատվոգրերով ու գավաթներով: Յուրաքանչյուր մասնակից 1 կմ 800 մ երկարությամբ վազքուղին պետք է հաղթահարեր ամենակարճ ժամանակահատվածում, որպեսզի արժանանար լավագույնի կոչմանը:

dahuk mrcuyt

Հավելենք, որ դահուկավազքը ձմեռային մարզաձև է, մրցում են հատուկ պատրաստված ձյունե երթուղով, օգտագործում են դահուկներ և դահուկափայտեր: Պաշտոնական մրցումները անցկացվում են 800 մետրից մինչև 50 կիլոմետր: Դահուկավազքը ընդգրկված է Ձմեռային Օլիմպիական խաղերում 1924 թվականից:

Առաջին անգամ դահուկավազքի մրցումներ կայացել են Նորվեգիայում 1767 թվականին: Իսկ 1924 թվականին ստեղծվել է Դահուկային մարզաձևի Միջազգային ֆեդերացիան (FIS):