ԱՄՆ-ի պետքատուղարությունը հրապարակել է 2016 թվականի` կրոնի ազատության մասին տարեկան զեկույցը: Ամերիկացի դիվանագետները հորդորում են պահպանել միջկրոնական հանդուրժողականության, երկխոսության, փոխադարձ հարգանքի մթնոլորտ:

Aliq.media լրատվականի փոխանցմամբ, զեկույցի Վրաստանին վերաբերող հատվածում անդրադարձ է արվում նաև հայ առաքելական եկեղեցու Վիրահայոց թեմին, եկեղեցու հետևորդների թվաքանակին և այլնի մասին:

Հենվելով 2014 թվականին Վրաստանում ացնկացված մարդահամարի տվյալների վրա, պետքարտուղարության հրապարակած փաստաթղթում նշվում է, որ երկրի բնակչության 83,4 %-ը վրաց ուղղափառ եկեղեցու հետևորդ է, շուրջ 11 տոկոսի է հասնում Վրաստանի մահմեդական բնակչությունը, իսկ հայ առաքելական եկեղեցու անդամների թվաքանակը ընդհանուր բնակչության 2.9 տոկոսն է կազմում: Մնացած կրոնական ուղղություններն ու հարանվանությունները, այդ թվում` հրեաները, եզդիները, հույները, կաթոլիկները, ռուսներն ու այլոք միասին վերցրած` Վրաստանի ընդհանուր բնակչության ընդամենը 3 տոկոսն են կազմում:

Զեկույցում անդրադարձ է կատարվում նաև 2014 թվականին Վրաստանի խորհրդարանի կողմից ընդունված օրենքին, որի համաձայն երկրի մի քանի կրոնական կազմակերպությունների ֆինանսական փոխհատուցում է տրամադրվում Խորհրդային շրջանում պատճառված «բարոյական և նյութական» վնասի դիմաց:

Նշվում է, որ 2016 թվականին Վրաստանի մահմեդական, հրեական, կաթոլիկ և հայ առաքելական համայնքները պետական բյուջեից 4.5 մլն լարիի (1.7 միլիոն ԱՄՆ դոլար) փոխհատուցում են ստացել: Նշված գումարի մեծ մասը` շուրջ 1 մլն ԱՄՆ դոլար բաժին է հասել մահմեդական համայնքին: Երկրորդ տեղում է հայ առաքելական եկեղեցու Վիրահայոց թեմը` 300 հազար ԱՄՆ դոլարով:

ԱՄՆ-ի պետքարտուղարության զեկույցի` «կառավարության քաղաքականություն» հատվածում նշվում է, որ Վրաստանում ամերիկյան դեսպանության աշխատակիցները պարբերաբար հանդիպել են երկրի սուննի և շիա մահմեդական համայնքների, ինչպես նաև Վիրահայոց թեմի հոգևոր դասի ներկայացուցիչների հետ:

Կրոնի ազատության մասին տարեկան զեկույցի վերջին մասում մասնավորապես նշված է, որ կրոնական համայնքների հետ հանդիպումների ընթացքում ամերիկացի դիվանագետները հորդորել են պահպանել միջկրոնական հանդուրժողականության, երկխոսության, փոխադարձ հարգանքի և հանդուրժողականության մթնոլորտ: