Այսօր` հունվարի 15-ին, Վրաստանում ժամը 15:00-ից սկսած գործատուներն ու աշխատողները կսկսեն համընդհանուր նախազգուշական գործադուլ։ Ինչպես նշում են կազմակերպիչները, բողոքի ակցիայի նպատակն է հանրությանը ցույց տալ, թե ինչ է սպասվում Վրաստանին մեկուսացված պայմաններում։ Գործադուլը կտևի 3 ժամ։
Գործադուլի հիմնական պահանջներն են նոր ընտրություններ և բողոքի ակցիաների ժամանակ ձերբակալվածների ազատ արձակում։
Գործադուլին են միացել ավելի քան 500 կազմակերպություն տարբեր ոլորտներից, ներառյալ հյուրանոցներ, խանութներ, բիզնես կենտրոններ, լրատվականներ, էսթետիկ կենտրոններ, դեղատներ և այլն:
Երեկ Վրաստանում գործող երկու խոշորագույն բանկերը՝ Bank of Georgia-ն ու TBC-ն չեն միացել գործադուլին, բայց հայտարարություն են տարածել: Ֆինանսական կառույցները գրում են, որ իրենք միշտ պաշտպանել են և պաշտպանելու են իրենց աշխատակիցների ազատ արտահայտվելու իրավունքը։ Ըստ այդմ՝ գործադուլին մասնակցելու հնարավորություն կունենան այն աշխատակիցները, ովքեր դա կցանկանան։
Կազմակերպիչները տարածել են հետևյալ պլանը․
«Ժամը 15:00-ին փակում ենք դուռը և կանգնում գրասենյակից դուրս:
Դրոշներով և/կամ պաստառներով. (Ազատություն բանտարկյալներին. Պահանջում ենք նոր ընտրություններ)
Ձայնագրում ենք ուղիղ եթեր/լուսանկար, հրապարակում #იფიცებისაქართველო հեշթեգով
Ովքեր գրասենյակ չունեն, գնում են հանրապետության հրապարակ
Գործադուլի ավարտից հետո կհավաքվենք խորհրդարանի դիմաց»։
Jnews միանում է ակցիային և պահանջում՝ արդարություն, արդարադատություն, ոչ բռնությանը։
