Օգոստոսի 26-ին, Ախալքալաքում տեղի ունեցավ հանդիպում մի շարք կարևոր թեմաների շուրջ, որտեղ մասնակիցները հնարավորություն ունեցան նաև հարց ու պատասխանի ռեժիմով իրենց հուզող հարցերը բարձրացնել։ Այնպիսի հարցեր ինչպիսիք են մոտալուտ ընտրությունները, երկրի ներքին քաղաքական իրավիճակը, երիտասարդների ակտիվության կարևորությունը և այլն:
Jnews-ը զրույց ունեցավ საქართველოს ევროპული ორბიტა-ի (Վրաստանի եվրոպական ուղեծիր) քաղաքացիական հարթակի գործադիր տնօրեն Նինո Լոմջարիայի հետ, ով ընդգծեց այսպիսի հանդիպումների կարևորությունն ու նշանակությունը:
«Մենք ներկայացնում ենք քաղաքացիական հարթակ საქართველოს ევროპული ორბიტა-ն։ Ամբողջ Վրաստանի տարածքում մեր գործընկերների հետ միասին հանդիպում ենք երիտասարդների և քաղաքացիական հասարակության ներկայացուցիչների հետ։ Մենք խոսում ենք եվրաինտեգրացիայի, ընտրությունների և մարդկանց ակտիվության կարևորության մասին, որպեսզի նրանք պատկերացում կազմեն, թե ինչ մեծ դեր կարող է ունենալ իրենց մեկ ձայնը Վրաստանի եվրաինտեգրացիայի ճանապարհին», – ասաց Նինո Լոմջարիան:
Ախալքալաքում հանդիպմանը խոսվեց նաև հասարակական կազմակերպությունների «Քո ձայնը Եվրամիությանը» կոալիցիայի նախաձեռնության մասին, որի շրջանակներում տարածվում է տեղեկություն եվրաինտեգրացիայի մասին, ինչպես նաև հոկտեմբերին կայանալիք ընտրությունների։ Ի դեպ քաղաքացիական այս հարթակն ընտրությունների ժամանակ դիտորդական առաքելություն կիրականացնի։
Հանդիպումն անցավ հետաքրքիր քննարկումներով և տեղեկատվության փոխանակումներով: