Վրաստանում տրանսպորտային միջոցների տեխզննման արժեքը 2025 թվականից կարող է աճել 50 տոկոսով՝ թեթև մարդատար ավտոմեքենաների համար 60-ից դառնալով 90 լարի։ Այս մասին Business Partner-ին հայտնել է «Տեխնիկական զննման կենտրոնների միավորման» տնօրեն Գիորգի Շիոլաշվիլին։
«Արդեն հինգ տարի է, ինչ սկսվել է տեխզննման բարեփոխումը: Ելնելով դրանից՝ անհրաժեշտություն առաջացավ վերանայել սակագինը»,- ասել է նա։
Տեխզննման կենտրոններն իրենք են պնդել, որ սակագները վերանայվեն։ Այնտեղ խոսում են կադրերի արտահոսքի ռեկորդային տեմպերի ու ներդրումների անհրաժեշտության մասին։
Շիոլաշվիլիի խոսքով, իրենք այժմ այս հարցով խորհրդակցում են էկոնոմիկայի նախարարության հետ։
«Իրենց տեխզննման կենտրոններից կադրերի արտահոսքը շատ մեծ է։ Անցյալ տարի այս ցուցանիշը կազմել է 57-59%, ինչը աղետալիորեն բարձր ցուցանիշ է։ Տեխնիկական զննման կենտրոնների համար դժվար է կադրեր գրավել այն ռեսուրսներով, որոնք այսօր ունեն»,- ասել է Շիոլաշվիլին։
Սակագների բարձրացմանը զուգընթաց տեխզննման կենտրոնները ստուգումները կսկսեն 2025 թվականի հունվարից։ Մոնիտորինգը կիրականացնի Ցամաքային տրանսպորտի գործակալությունը։ Աշխատանքը վերահսկվելու է հսկիչ տեսախցիկների միջոցով, ինչպես նաև տեղում՝ շարժական խմբերի միջոցով։ Խախտումների համար նախատեսված են տուգանքներ՝ մինչև 5 հազար լարի, եթե խոսքը մեքենայի վտանգավոր դեֆեկտի մասին է։
Վրաստանում 2018 թվականից բոլոր կատեգորիաների մեքենաների տեխնիկական զննումը պարտադիր է դարձել։ Դրանից ի վեր սակագները ոչ մի անգամ չեն վերանայվել։
Թեթև մարդատար ավտոմեքենաների համար տեխզննում անցնելու արժեքը կազմում է 60 լարի (մոտ 20,8 դոլար), բեռնատարների համար՝ 100 լարի (ավելի քան 34,6 դոլար), էլեկտրամոբիլների համար՝ 48 լարի։
Ութ տարուց ավելի հին մեքենաները պետք է տեխզննում անցնեն ամեն տարի, իսկ ավտոմեքենաները, որոնք չորսից ութ տարեկան են՝ երկու տարին մեկ անգամ: Մինչև չորս տարեկան նոր մեքենաները տեխզննման կարիք չունեն։
