Ախալքալաքի քաղաքապետարանը կրկին մրցույթ է հայտարարել թափառող շների բռնման, ստերջացման, կաստրացիայի, պատվաստման, նույնականացման և վերադարձի, իսկ անհրաժեշտության դեպքում՝ էֆթանազիայի համար։ Հայտերն ընդունվում են մայիսի 19-ից մայիսի 21-ը։
Քաղաքապետարանը թափառող շներին բռնելու մրցույթ է հայտարարում արդեն երկրորդ անգամ։ Նախկինում այն հայտարարվել էր ապրիլի 19-ին 25 986 լարիի չափով, ինչպես և նոր մրցույթը։ Մրցույթի համաձայն՝ նախատեսվում է բռնել 142 թափառող շուն, ծառայությունը պետք է մատուցվի մինչև դեկտեմբերի 31-ը։ Ընթացակարգերն ավարտելուց հետո շներին պետք է նույնականացնել և վերադարձնել Ախալքալաք, կամ, անհրաժեշտության դեպքում, էֆթանազիայի ենթարկել:
Հիշեցնենք, որ վերջին մրցույթը, քաղաքապետարանի աշխատակիցների պնդմամբ, դադարեցվել էր տեխնիկական պատճառներով։
«Մրցույթը կասեցված է, տեխնիկական հարցերը վերանայելու, ճշտումներ անելու կարիք կա։ Այսինքն՝ պետք է շուկայական ճշգրիտ գնահատական տալ»,- մրցույթի դադարեցումից հետո պարզաբանել է Ախալքալաքի քաղաքապետարանի պետական գնումների բաժնի պետ Ռոզա Յորդանյանը։
Ընդ որում, նոր մրցույթի գումարը չի փոխվել, նաև չեն փոխվել տեխնիկական պահանջները։
