Այսօր՝ ապրիլի 30-ին, ի պատասխան «Վրացական երազանք» կուսակցության կողմից իրականացրած երեկվա «Գործակալների օրենքի» աջակցության հանրահավաքի, քաղաքացիական հասարակությունը կրկին անգամ դուրս է եկել փողոց, արտահայտելու իր բողոքը: Ուսանողներն առանձին խմբով երթ սկսեցին, որը ժամը 19:00-ին միացավ խորհրդարանի դիմաց տեղի ունեցող գլխավոր ակցիային:
Ուսանողների երթը սկիզբ առավ Իլիայի պետական համալսարանի դիմացից, ԹՊՀ-ի առաջին մասնաշենքից։ Երթին միացան ԹՊՀ-ի և այլ համալսարանի ուսանողներ, ովքեր քայլերթով միացան գլխավոր ակցիային: Նրանք ամբողջ ճանապարհին ծածանում էին Վրաստանի և ԵՄ դրոշները, կոչ անում մարդկանց միանալ իրենց, ինչպես նաև պաստառներ էին պարզել տարբեր գրություններով.
«Վաղը միջանկյալ քննության եմ, բայց այսօր երկիրը վերջնական քննության է մասնակցում», «Հավատա ինձ, եվրոն ավելի լավն է դարձնում», «Ոչ ռուսական օրենքին», «Ոչ մի դեպքում քայլ դեպի հետ»:
Ուսանողները քայլերթի ժամանակ վանկարկում էին. «Ո՞վ ենք մենք»
«Ուսանողներ»
«Ի՞նչ ենք ուզում»
«Եվրոպա»
Վրաստանի համալսարանի ուսանող Մարիամ Լողվան մեկնաբանում է. «Մենք չպետք է թողնենք, որ մեզ խանգարեն եվրոինտեգրման ճանապարհին և փորձեն նմանեցնել ազատությունից և ցիվիլիզացիայից հեռու Ռուսաստանին։ Որպես ուսանողներ և երիտասարդներ մեր պարտքն է այսօր կանգնել մեր համաքաղաքացիների կողքին, ովքեր բողոքարկում են կառավարության ռուսամետ քայլերն ու հայտարարությունները, մենք պետք է հստակ ընդգծենք մեր դիրքորոշումն այս հարցի շուրջ»։
Ուսանողների երթին միացան նաև դասախոսներ, ովքեր ևս իրենց պարտքն են համարում կանգնել իրենց ուսանողների կողքին և աջակցել նրանց:
ԹՊՀ-ի իրավաբանական ֆակուլտետի դասախոս Թամարա Ալեքսիձեն, ով միջազգային իրավագիտություն է դասավանդում, նշեց որ այսօր այստեղ է այն պատճառով, որ այլ տեղ չէր կարող լինե,լ երբ իր երկիրն այսպիսի պատմական փուլ է ապրում:
«Այսօր ես այստեղ եմ, որովհետև որոշվում է մեր բոլորի ճակատագիրը, այստեղ ազատ մարդկանց հավաք է, և այստեղ՝ իմ, ուրիշների և մեր վարչապետի ուսանողներն են հավաքված։ Հիմարություն է դեմ կանգնել այսպիսի մեծ ուժի դեմ, հատկապես երբ դու սխալ ես, այն ինչ երեկ տեսանք, դա պարզապես սրտացավություն առաջացրեց ինձ մոտ և ես մտածում էի, արդյոք այսքան մարդ ցանկանում է ստրկության մեջ ապրել, ես ազատություն եմ ցանկանում մեզ բոլորիս և այդ մարդկանց ևս»:
Այս պահին իրավիճակը լարված է: Խորհրդարանի մոտ «Գործակալների օրենքի» դեմ ցույցի ժամանակ ոստիկանների կողմից հատուկ միջոցների/սփրեյի և ուժի կիրառումից հետո մի քանի մարդ վիրավորվել է։
Այս պահին վիրավորների ստույգ թիվը հայտնի չէ։
Վիրավորների թվում է «Ազգային շարժման» պատգամավոր Անի Ցիտլիձեն, ում աչքերին պղպեղ են ցողել։ Նրան բուժօգնություն է ցուցաբերել շտապօգնության բրիգադը։
Վիրավորվել են նաև լրագրողներ, դասախոսներ և երիտասարդներ:
Ցուցարարների դեմ կիրառվում է նաև ջրցան մեքենա:
