Մարտի 28-ին Ախալքալաքի մունիցիպալիտետի սակրեբուլոյում տեղի ունեցավ քաղաքապետարանին հաշվետու «Ախալքալաքի ծառայության կենտրոն» ոչ առևտրային կազմակերպության հաշվետու լսումները։ Կազմակերպությունը զեկուցեց իր գործունեության, խնդիրների ու ձեռքբերումների մասին։
Լսումներից և իրավիճակի վերլուծությունից հետո կմշակվեն հանձնարարականներ և առաջարկություններ, որոնք կուղղորդվեն քաղաքապետարան։
Տնօրեն Մխիթար Ռստակյանը պատմեց Սպասարկման կենտրոնի աշխատանքի մասին: Ախալքալաքի շրջանի 64 գյուղերից Սպասարկման կենտրոնը աղբահանության ոլորտում սպասարկում է 62 գյուղ: Աղբը չի հավաքվում միայն Բուզավեթ և Թախչա գյուղերից: Մնացած բոլոր գյուղերում տեղադրված են աղբամաններ, որոնք սպասարկում է Սպասարկման կենտրոնը։
Մխիթար Ռստակյանի խոսքով, իրենք աղբամանների պակաս ունեն: Ինչին պատգամավորներն ասացին, որ 2024 թվականի բյուջեով գումար է հատկացվել 100 աղբարկղ գնելու համար, իսկ 2024 թվականի բյուջեի վերջին փոփոխության ժամանակ կրկին գումար է հատկացվել եւս 100 աղբարկղ գնելու համար։ Ռստակյանը նշեց, որ մեր բնակլիմայական պայմաններում մետաղական աղբամաններն ավելի հարմար են, նրանք թեև թանկ են, բայց ավելի դիմացկուն են։
Սպասարկման կենտրոնն աղբահանության վճար հավաքում է 17 գյուղից և քաղաքից։ Ֆիզիկական անձանց համար աղբահանության վճարը մեկ անձի համար կազմում է 40 թեթրի, իսկ իրավաբանական կազմակերպությունների համար աղբահանությունը 1 խորանարդ մետրի համար 25 լարի է։ 18 վերահսկիչ ֆիզիկական անձանցից վճար է հավաքում և ստանում հավաքված գումարի 30%-ի չափով աշխատավարձ։
Մխիթար Ռստակյանը նշեց, որ ոչ բոլոր իրավաբանական կազմակերպություններն են ցանկանում իրենց հետ պայմանագիր կնքել, իսկ ֆիզիկական անձինք, հատկապես քաղաքում, ցանկանում են աղբի վճարումը կատարել բանկում։
Պետական աուդիտի ծառայությունն Ախալքալաքի մունիցիպալիտետի 2021-2022 թվականների գործունեության համապատասխանության հաշվետվության մեջ նշել էր, որ Սպասարկման կենտրոնը չունի աղբահանության բաժանորդների տվյալների բազա գյուղերում։ Սպասարկման կենտրոնի տնօրենի խոսքով, իրենք արդեն աշխատում են բազա ստեղծելու ուղղությամբ։
Նա առաջարկեց, որպեսզի քաղաքն անցնի բիլինգով վճարմանը (սա բիզնես գործընթացների համալիր է բնակարանային և կոմունալ ծառայությունների հաշվառման համակարգում): Դա անելու համար հարկավոր է գնել և ներդնել նոր համակարգ:
Սպասարկման կենտրոնը զբաղվում է նաև որոշ գյուղերի ջրամատակարարմամբ, զբաղվում է քաղաքի կանաչապատմամբ, եղանակը տաքանալուն պես պատրաստվում են քաղաքում սկսել ծառատունկը։
Սպասարկման կենտրոնն ունի 10 միավոր հատուկ տեխնիկա՝ աղբատար, գրեյդեր, բոբկատ, վիշկա և այլն։ Այս տարի նրանք կստանան ևս երեք միավոր նոր տեխնիկա։
Պատգամավորներն առաջարկեցին փոխել կազմակերպության կանոնադրությունը, որպեսզի կարողանան վարձակալության տալ հատուկ տեխնիկան, քանի որ մունիցիպալիտետում նման տեխնիկա չկա, և դրանք պահանջված են բնակչության շրջանում։ Այն կազմակերպությանը թույլ կտա լրացուցիչ եկամուտ ունենալ։
Սպասարկման կենտրոնում աշխատում են 63 հաստիքային, 1 արտահաստիքային աշխատող և 18 հսկիչ: Սպասարկման կենտրոնն ունի մեկ թափուր հաստիք։
